കേരളം
‘സ്പീക്കര്‍ പദവി രാഷ്ട്രീയ ജീവിതത്തിലെ ഭാഗ്യം, കോടിയേരിയുടെ ചരമക്കുറിപ്പ് വായിക്കുന്നത് പ്രയാസമെന്ന് എ എന്‍ ഷംസീര്‍
സ്പീക്കര്‍ പദവി പുതിയ റോളെന്നും രാഷ്ട്രീയ ജീവിതത്തിലെ ഭാഗ്യമെന്നും സ്പീക്കര്‍ എ എന്‍ ഷംസീര്‍. സ്പീക്കര്‍ പദവിയില്‍ ആദ്യമായി നിയമസഭ നിയന്ത്രിക്കാന്‍ പോകുന്ന വേളയിലാണ് എ എന്‍ ഷംസീറിന്റെ പ്രതികരണം.
‘സ്പീക്കര്‍ പുതിയ ഒരു റോള്‍ ആണല്ലോ. സിനിമയില്‍ ഓരോരുത്തരും ഓരോ കാലഘട്ടത്തില്‍ ഓരോ റോള്‍ അഭിനയിക്കാറുണ്ട്. ഇപ്പോള്‍ എന്നെ ഏല്‍പ്പിച്ച റോള്‍ സ്പീക്കര്‍ പദവിയാണ്. സ്പീക്കര്‍ ഒരു ഭരണഘടനാ പദവിയാണ്. ആ റോള്‍ നല്ലരീതിയില്‍ കൈകാര്യം ചെയ്യാന്‍ മുന്‍ഗാമികള്‍ ശ്രമിച്ചു. ഞാന്‍ അത്തരത്തില്‍ നല്ലരീതിയില്‍ സഭ നടത്തി കൊണ്ടുപോകാന്‍ ശ്രമിക്കും.’- ഷംസീര്‍ മാധ്യമങ്ങളോട് പറഞ്ഞു.
‘ഇന്ന് എന്നെ അലട്ടുന്ന ഒരു പ്രശ്‌നമുണ്ട്. ഇന്ന് ചരമക്കുറിപ്പ് വായിക്കേണ്ടതുണ്ട്. എന്റെ രാഷ്ട്രീയ ഗുരുനാഥനായ കോടിയേരി ബാലകൃഷ്ണന്റെ ചരമക്കുറിപ്പ് വായിക്കേണ്ട സാഹചര്യം ഉണ്ട് എന്നതാണ്. അത് വ്യക്തിപരമായി എനിക്ക് പ്രയാസവും സംഘര്‍ഷവും ഉണ്ടാക്കുന്നതാണ്’- ഷംസീര്‍ പറഞ്ഞു.
