കേരളം
ഗ്രൂപ്പിസം കോണ്‍ഗ്രസിന്റെ ആണിവേരറുക്കും; സുഖം മാത്രം അറിയുന്നവരാണ് പാര്‍ട്ടിയുടെ തലപ്പത്തുളളവരെന്ന് എ വി ഗോപിനാഥ്
ഗ്രൂപ്പിസം കോണ്‍ഗ്രസിന്റെ ആണിവേരറുക്കുമെന്ന് മുന്‍ എം.എല്‍.എ എ.വി. ഗോപിനാഥ്. കോണ്‍ഗ്രസ് പുനഃസംഘടന ഉണ്ടായേ തീരൂ. പ്രവര്‍ത്തകരുടെ വികാരം മനസിലാക്കാതെ മന്നോട്ട് പോകാനുള്ള തീരുമാനം അംഗീകരിക്കില്ല. ദുഃഖങ്ങളും പ്രയാസങ്ങളും മനസിലാക്കാന്‍ നേതാക്കള്‍ക്ക് കഴിയുന്നില്ലെന്നും സുഖം മാത്രം അറിയുന്നവരാണ് പാര്‍ട്ടിയുടെ തലപ്പത്തുള്ളവരെന്നും ഗോപിനാഥ് പറഞ്ഞു.
പാര്‍ട്ടിയില്‍ മാറ്റം അനിവാര്യമാണ്. ഗ്രൂപ്പിസം കോണ്‍ഗ്രസിന്റെ ആണിവേര് അറുക്കും. കോണ്‍ഗ്രസിന് ജീവന്‍ നല്‍കിയ പ്രവര്‍ത്തകര്‍ പ്രതിസന്ധിയിലാണ്. തന്റെ ശബ്ദം നേതൃത്വം മറ്റൊരു അര്‍ത്ഥത്തിലെടുത്തു. നേതാക്കളുമായുള്ള ചര്‍ച്ചകള്‍ പ്രതീക്ഷിച്ച പോലെ മന്നോട്ട് പോകുന്നില്ല. നേരിയ പ്രതീക്ഷ മാത്രമാണ് ഇപ്പോഴുള്ളതെന്നും നാളെ രാത്രിവരെ അനുകൂലതീരുമാനത്തിനായി കാത്തിരിക്കുമെന്നും ഗോപിനാഥ് വ്യക്തമാക്കി.
സ്വന്തം പാര്‍ട്ടിയില്‍ നിന്ന് ചവിട്ടുകള്‍ ഏല്‍ക്കമ്ബോള്‍ എന്ത് ചെയ്യും. കൂടെ നില്‍ക്കേണ്ടവര്‍, സംരക്ഷിക്കേണ്ട ആളുകള്‍ പിന്‍ തിരിഞ്ഞു നടക്കാന്‍ തുടങ്ങിയിട്ട് 20 വര്‍ഷമായി. ഇതു വരെ താന്‍ മനസ് തുറന്നിട്ടില്ല. കൂടെയുള്ള പ്രവര്‍ത്തകരെ വഞ്ചിച്ച്‌ പോകാന്‍ തനിക്ക് കഴിയില്ല. കോണ്‍ഗ്രസ് അഖിലേന്ത്യാ നേതാക്കളെ വിവരം അറിയിച്ചിട്ടുണ്ട്. ദുഃഖങ്ങളും പ്രയാസങ്ങളും മനസിലാക്കാന്‍ നേതാക്കള്‍ക്ക് കഴിയുന്നില്ലെന്നും സുഖം മാത്രം അറിയുന്നവരാണ് പാര്‍ട്ടിയുടെ തലപ്പത്തുള്ളവരെന്നും ഗോപിനാഥ് കുറ്റപ്പെടുത്തി.
പ്രശ്നപരിഹാരം വൈകുന്നതിനെ തുടര്‍ന്ന് ഭാവി പരിപാടികള്‍ തീരുമാനിക്കാന്‍ തന്നെ അനുകൂലിക്കുന്നവരെ വിളിച്ചുകൂട്ടി ഗോപിനാഥ് ഇന്ന് യോഗം ചേര്‍ന്നിരുന്നു. ഗോപിനാഥ് എന്ത് തീരുമാനമെടുത്താലും ഒപ്പമുണ്ടെന്ന് ഒരു വിഭാഗം പ്രവര്‍ത്തകര്‍ വ്യക്തമാക്കിട്ടുണ്ട്. പെരിങ്ങോട്ടുകുറിശ്ശി കോണ്‍ഗ്രസ് മണ്ഡലം കമ്മിറ്റി പ്രവര്‍ത്തകര്‍, പഞ്ചായത്ത് ഭരണസമിതി അംഗങ്ങള്‍ എന്നിവരും യോഗത്തില്‍ പങ്കെടുത്തു.
ഗ്രൂപ്പില്ലാത്തതിന്റെ പേരില്‍ താന്‍ അവഗണിക്കപ്പെട്ടെന്ന പരാതിയെത്തുടര്‍ന്ന് പാര്‍ട്ടി നേതൃത്വം ഗോപിനാഥിന് പട്ടാമ്ബി സീറ്റ് നല്‍കാമെന്ന് നേരത്തെ അറിയിച്ചിരുന്നു. എന്നാല്‍ തിരഞ്ഞെടുപ്പില്‍ മത്സരിക്കാനല്ല തന്റെ താല്‍പര്യമെന്ന് അദ്ദേഹം വ്യക്തമാക്കുകയായിരുന്നു.
