ആരോഗ്യം
കോട്ടയത്ത് കോവിഡ് സ്ഥിരീകരിച്ച മൂന്നു പേരും വിദേശത്ത് നിന്നെത്തിയവര്‍: രോഗബാധിതരില്‍ രണ്ടു പേര് ഹോം ക്വാറന്റീനില്‍
കോട്ടയത്ത് കോവിഡ് സ്ഥിരീകരിച്ച മൂന്നു പേരും വിദേശത്ത് നിന്നെത്തിയവര്‍. സൗദി അറേബ്യയില്‍ നിന്ന് മെയ് 23 ന് ഹൈദരാബാദ് വഴിയെത്തിയ പാലാ സ്വദേശി(49), ജൂണ്‍ രണ്ടിന് കുവൈറ്റില്‍നിന്നെത്തിയ കോരുത്തോട് സ്വദേശി(30), ദോഹയില്‍നിന്നും ജൂണ്‍ അഞ്ചിന് എത്തിയ പാറത്തോട് സ്വദേശി(30) എന്നിവര്‍ക്കാണ് രോഗം സ്ഥിരീകരിച്ചത്.
പാലാ സ്വദേശി മെയ് 29ന് ഹൈദരാബാദില്‍ സാമ്പിള്‍ പരിശോധനയ്ക്ക് വിധേയനായിരുന്നെങ്കിലും ഫലം നെഗറ്റീവായിരുന്നു. നാട്ടിലെത്തി ചൂണ്ടച്ചേരിയിലെ ക്വാറന്റയിന്‍ കേന്ദ്രത്തില്‍ കഴിയുമ്പോഴാണ് വീണ്ടും സാമ്പിള്‍ ശേഖരിച്ചത്.
കോരുത്തോട് സ്വദേശിയും പാറത്തോട് സ്വദേശിയും വീട്ടില്‍ ക്വാറന്റയിനില്‍ കഴിയുകയായിരുന്നു. ഇതോടെ രോഗം ബാധിച്ച് ചികിത്സയില്‍ കഴിയുന്ന കോട്ടയം ജില്ലക്കാരുടെ എണ്ണം 46 ആയി. ഇതില്‍ ഒരാള്‍ എറണാകുളം മെഡിക്കല്‍ കോളേജ് ആശുപത്രിയിലാണ്.
അതേസമയം കോട്ടയം ജില്ലയില്‍ രോഗ ബാധിതനായിരുന്ന 82 കാരന്റെ പരിശോധനാ ഫലം നെഗറ്റീവായി. ഈ മാസം രണ്ടിന് രോഗം സ്ഥിരീകരിച്ച ഇടയിരിക്കപ്പുഴ സ്വദേശിയാണ് രോഗമുക്തനായത്.
