കേരളം
ദേശീയ പതാകയുടെ നിറത്തില്‍ മസാല പുരട്ടി കോഴികളെ ചുട്ടു; യൂട്യൂബര്‍ക്ക് എതിരെ പരാതി
സ്വാതന്ത്ര്യ ദിനത്തില്‍ 48 കോഴികളെ ദേശീയ പതാകയുടെ നിറത്തില്‍ മസാല തേച്ച് കമ്പിയില്‍ കോര്‍ത്ത് ചുട്ടെടുക്കുന്ന വീഡിയോ പോസ്റ്റ് ചെയ്ത യൂട്യൂബര്‍ ജിയോ മച്ചാന്‍ എന്ന ജിയോ ജോസഫിന് എതിരെ പൊലീസില്‍ പരാതി. കഴക്കൂട്ടം സ്വദേശി ജിതിന്‍ ആണ് കഴക്കൂട്ടം പൊലീസില്‍ പരാതി നല്‍കിയത്. സമൂഹമാധ്യമങ്ങളിലൂടെ ദേശീയ പതാകയെ അപമാനിച്ചെന്നാണ് പരാതിയില്‍ ആരോപിക്കുന്നത്.
സ്വാതന്ത്ര്യ ദിനത്തില്‍ ദേശീയ പതാകയുടെ നിറത്തിലുള്ള മസാല തേച്ച കോഴികളെ ഒന്നൊന്നായി കമ്പിയില്‍ കോര്‍ത്ത് ചുട്ടെടുത്തത് ജനവികാരം വ്രണപ്പെടുത്തിയെന്ന് പരാതിയില്‍ ആരോപിക്കുന്നു. ‘സ്വാതന്ത്രക്കോഴി ചുട്ടത്’ എന്ന പേരിലാണ് ഇയാള്‍ വീഡിയോ യൂട്യൂബില്‍ പോസ്റ്റ് ചെയ്തത്.
ഇതിനോടകം ഏട്ട് ലക്ഷത്തിലധികം ആളുകള്‍ വീഡിയോ കണ്ടു കഴിഞ്ഞു. യൂട്യൂബ് ട്രെന്‍ഡിങ് പട്ടികയിലും ഈ വീഡിയോ ഇടംപിടിച്ചു. എന്നാല്‍ സമൂഹത്തിന് തെറ്റായ സന്ദേശമാണ് വീഡിയോ നല്‍കുന്നതെന്നും പരാതിക്കാരന്‍ ആക്ഷേപിക്കുന്നു. പരാതി ലഭിച്ചതായും നടപടികളൊന്നും സ്വീകരിച്ചിട്ടില്ലെന്നും കഴക്കൂട്ടം പൊലീസ് അറിയിച്ചു. ദൃശ്യങ്ങള്‍ സൈബല്‍ സെല്ലിന്റെ സഹായത്തോടെ പരിശോധിക്കുമെന്നും പൊലീസ് പറഞ്ഞു.
