ഫ്രിഡ്ജ് വേണ്ട, വൈദ്യുതി വേണ്ട, ഇങ്ങനേയും വെള്ളം തണുപ്പിക്കാം

പണ്ടൊക്കെ നമ്മളുടെ വീട്ടില്‍ സ്ഥിരമായി ഉണ്ടായിരുന്ന ഒരു പാത്രമാണ് കൂജ. നല്ല കളിമണ്ണുകൊണ്ട് ഉണ്ടാക്കിയെടുക്കുന്ന ഈ പാത്രത്തില്‍ വെള്ളം നിറച്ച് അടച്ച് വെക്കും. ഇന്ന് നമ്മള്‍ വെള്ളം തണുപ്പിക്കാന്‍ ഫ്രിഡ്ജ് ഉപയോഗിക്കുന്നില്ലേ? അതുപോലെ തന്നെ അന്നുകാലത്ത് ഈ വേനല്‍കാലത്ത് നല്ല തണുത്ത വെള്ളം ലഭിക്കുന്നതിന് ഉപയോഗിച്ചിരുന്ന മാര്‍ഗ്ഗമാണ് കൂജ.

ഇന്നും ചന്തയില്‍ പോയാല്‍ നമുക്ക് പുതിയ രൂപത്തിലുള്ള കൂജകള്‍ ലഭ്യമാണ്. തികച്ചും പ്രകൃതിദത്തമായ രീതിയില്‍ വെള്ളത്തെ തണുപ്പിച്ചെടുക്കുന്ന കൂജകള്‍ ആരോഗ്യത്തിനും നല്ലതാണ്. നിരവധി ഗുണങ്ങളാണ് ഇതിലൂടെ ലഭിക്കുന്നത്. വൈദ്യുതി ചെലവ് പോലും ഇല്ലാതെ വെള്ളത്തെ തണുപ്പിക്കുന്ന ഈ കൂജകളില്‍ വെള്ളം ഒഴിച്ച് വെച്ചാലുള്ള ഗുണങ്ങള്‍ എന്തെല്ലാമെന്ന് നോക്കാം.

പൊതുവില്‍ ഫ്രിഡ്ജില്‍ വെച്ച വെള്ളം കുടിക്കുന്നത് ആരോഗ്യത്തിന് നല്ലതല്ല. എന്നാല്‍, നമുക്ക് പ്രകൃതിദത്തമായി തണുപ്പിച്ച് എടുക്കുന്ന ഈ വെള്ളം ശരീരത്തെ തണുപ്പിക്കുകയും ദാഹം അകറ്റുകയും ചെയ്യുന്നു. മണ്‍പാത്രങ്ങളില്‍ ചെറിയ ചെറിയ സുഷിരണങ്ങള്‍ ഉള്ളതിനാല്‍ തന്നെ, ഇതിലൂടെ വെള്ളത്തിലെ ചൂട് കുറയുന്നതിനും വെള്ളം വേഗത്തില്‍ തണുക്കുന്നതിനും ഇത് സഹായിക്കുന്നുണ്ട്. ഇത് വെള്ളത്തിന്റെ താപം വേഗത്തില്‍ കുറയ്ക്കുകയും അങ്ങിനെ വെള്ളം തണുപ്പിച്ച് എടുക്കുകയും ചെയ്യുന്നു.

ഇന്ന് നമുക്ക് ലഭിക്കുന്ന വെള്ളത്തിനെല്ലാം തന്നെ അമ്ലത്വം കൂടുതലാണ്. ഇത് ആരോഗ്യത്തിന് നല്ലതല്ല. വീട്ടില്‍ കിണര്‍ ഉള്ളവര്‍ക്ക് പോലും ഇന്ന് നല്ല വെള്ളം കിട്ടാത്ത അവസ്ഥയാണ്. കാരണം മലിനീകരണം തന്നെ. ഇത് വെള്ളത്തിന്റെ കാര സ്വഭാവം മാറ്റി അതിന് അമ്ലത്വം ഉണ്ടാക്കുന്നു.

എന്നാല്‍, വെള്ളം കൂജയില്‍ ഒഴിച്ച് വെക്കുമ്പോള്‍ ഇത് വെള്ളത്തിലെ അമ്ലത്വം കുറയ്ക്കുന്നതിനും ആല്‍ക്കലൈന്‍ നല്‍കുന്നതിനും സഹായിക്കുന്നുണ്ട്. കാരണം, കളിമണ്ണില്‍ ആല്‍ക്കലൈന്‍ കണ്ടന്റ് കൂടുതലാണ്. അതിനാല്‍ തന്നെ, ഇതില്‍ ഒഴിച്ച് വെക്കുന്ന വെള്ളത്തിനും ഇതേ ഗുണം ലഭിക്കുന്നു. ഇത് ശരീരത്തിലെ പിഎച്ച് ലെവല്‍ ബാലന്‍സ് ചെയ്യുന്നതിന് സഹായിക്കുന്നു.

വേനല്‍ കടുക്കുമ്പോള്‍ പലര്‍ക്കും സൂര്യഘാതം ഏല്‍ക്കാറുണ്ട്. നമ്മള്‍ എത വെള്ളം കുടിച്ചാലും അല്ലെങ്കില്‍ കുടപിടിച്ച് പുറത്തേക്ക് ഇറങ്ങിയാലും സൂര്യാഘാതം ഏല്‍ക്കാനുള്ള സാധ്യത കൂടുതലാണ്. ഇത് കുറയ്ക്കാന്‍ കൂജയില്‍ നിറച്ച വെള്ളം കുടിക്കുന്നത് നല്ലതാണ്.

കാരണം, കൂജ നിര്‍മ്മിക്കുന്നത് തന്നെ കളിമണ്ണ് കൊണ്ടാണ്. ഇത് നമ്മള്‍ ഒഴിക്കുന്ന വെള്ളത്തിലെ പോഷകങ്ങള്‍ ശോഷണം സംഭവിക്കാതെ സംരക്ഷിക്കുന്നതിന് സഹായിക്കുന്നുണ്ട്. ഇത് ശരീരത്തെ നല്ലപോലെ ഹൈഡ്രേറ്റ് ചെയ്ത് നിലനിര്‍ത്താന്‍ സഹായിക്കുന്നു. അതിനാല്‍ തന്നെ, സൂര്യഘാതം ഏല്‍ക്കാനുള്ള സാധ്യതയും കുറയുന്നു.

വെള്ളത്തെ നല്ല പ്രകൃതിദത്തമായ രീതിയില്‍ ശുദ്ധീകരിച്ചെടുക്കാന്‍ കൂജയില്‍ വെള്ളം ഒഴിച്ച് വെച്ചാല്‍ മതി. ഇത് കുട്ടികള്‍ക്കായാലും വളരെ ധൈര്യമായി തന്നെ നല്‍കാവുന്നതാണ്. അതിനാല്‍ തന്നെ നിങ്ങള്‍ക്ക് കുടിക്കാന്‍ വേണ്ട വെള്ളം കൂജയില്‍ ഒഴിച്ച് വെക്കുന്നത് നല്ലതാണ്.

ചിലര്‍ ഈ വെള്ളത്തില്‍ വെള്ളാരം കല്ലുകള്‍ ഇടുന്നതും കാണാം. ഇതും വെള്ളത്തെ കൂടുതല്‍ ശുദ്ധീകരിച്ച് എടുക്കാന്‍ സഹായിക്കുന്നുണ്ട്.ശരീരത്തിലെ മെറ്റബോളിസം വര്‍ദ്ധിപ്പിക്കാന്‍ കൂജയില്‍ വെച്ച വെള്ളം ഉപയോഗിക്കുന്നത് നല്ലതാണ്. നമുക്ക് അറിയാം, മെറ്റബോളിസം കൂടുന്നത് ദഹനം കൃത്യമായി നടക്കുന്നതിനും അതുപോലെ, ശരീരഭാരം കുറയ്ക്കാനും നിയന്ത്രിക്കാനും ഇത് സഹായിക്കുന്നുണ്ട്.

അതിനാല്‍, വേനല്‍ക്കാലത്ത് ദഹന പ്രശ്‌നങ്ങള്‍ അകറ്റുന്നതിനും നല്ല ആരോഗ്യത്തിനും കൂജയില്‍ വെള്ളം സൂക്ഷിക്കുന്നത് നല്ലതാണ്. ഇത് കൂടാതെ, നമ്മള്‍ ഫ്രിഡ്ജില്‍ സൂക്ഷിച്ച വെള്ളം കുടിച്ചാല്‍ പലര്‍ക്കും കഫക്കെട്ട് വരാറുണ്ട്. എന്നാല്‍, കൂജയിലെ വെള്ളം കുടിച്ചാല്‍ കഫക്കെട്ട് വരാനും സാധ്യത വളരെ കുറവാണ്.