Uncategorized
ഫുട്‌ബോള്‍ ഇതിഹാസം ഡീഗോ മറഡോണയ്ക്ക് ആദരാഞ്ജലി അര്‍പ്പിച്ച് ലയണല്‍ മെസി
ഫുട്‌ബോള്‍ ഇതിഹാസം ഡീഗോ മറഡോണയ്ക്ക് ആദരാഞ്ജലി അര്‍പ്പിച്ച് അര്‍ജന്റൈന്‍ സൂപ്പര്‍ താരം ലയണല്‍ മെസി. തന്റെ സമൂഹമാധ്യമ അക്കൗണ്ടുകളിലൂടെയാണ് മെസി ആദരാഞ്ജലി അര്‍പ്പിച്ചത്.
ട്വിറ്റര്‍ ഹാന്‍ഡിലിലൂടെ ഒന്നിലധികം ട്വീറ്റുകള്‍ ചെയ്ത താരം ഫേസ്ബുക്ക് പേജിലൂടെ അദ്ദേഹത്തിന് ആദരാഞ്ജലി അര്‍പ്പിക്കുകയും ചെയ്തു. ‘ഫുട്‌ബോള്‍ ലോകത്തിനും അര്‍ജന്റീനയ്ക്കും ഇത് വളരെ ദുഖമുണ്ടാക്കുന്ന ഒരു ദിവസമാണ്.
അദ്ദേഹം നമ്മെ വിട്ടു പോയെങ്കിലും ഇവിടെയുണ്ടാവും. കാരണം, ഡിയേഗോ അനശ്വരനാണ്. അദ്ദേഹത്തോടൊപ്പമുള്ള എല്ലാ മനോഹര നിമിഷങ്ങളെയും ഞാന്‍ ഓര്‍മ്മിക്കുന്നു. അദ്ദേഹത്തിന്റെ സുഹൃത്തുക്കള്‍ക്കും കുടുംബത്തിനും എന്റെ അനുശോചനം അര്‍പ്പിക്കുന്നു’- മെസി ഫേസ്ബുക്കില്‍ കുറിച്ചു.
ബ്രസീല്‍ ഫുട്‌ബോള്‍ ഇതിഹാസം പെലെയും മറഡോണയുടെ മരണത്തില്‍ പ്രതികരിച്ചിരുന്നു. ‘ഒരിക്കല്‍ നമ്മള്‍ ആകാശത്ത് ഒരുമിച്ച് പന്തു തട്ടും’ എന്ന ഒരൊറ്റ വാചകം മാത്രമാണ് അദ്ദേഹം പറഞ്ഞത്.
റൂയിട്ടേഴ്‌സിനോടാണ് അദ്ദേഹം തന്റെ പ്രസ്താവന അറിയിച്ചത്. മരണത്തിന്റെ പശ്ചാത്തലത്തില്‍ അര്‍ജന്റീനയില്‍ മൂന്ന് ദിവസത്തെ ദുഖാചരണം പ്രഖ്യാപിച്ചു.
