ചെന്നിത്തലയെ വിമർശിക്കാൻ മുഖ്യമന്ത്രിക്ക് എന്ത് ധാർമ്മികതയെന്ന് കെ സുധാകരൻ

സംസ്ഥാന സർക്കാരിനെയും മുഖ്യമന്ത്രി പിണറായി വിജയനെയും കടന്നാക്രമിച്ച് കെ സുധാകരൻ എംപി. കഴിഞ്ഞ അഞ്ചു വർഷ കാലത്തെ പിണറായി സർക്കാരിൽ തീവെട്ടിക്കൊളളയാണ് നടന്നതെന്നും മുഖ്യമന്ത്രി ജനങ്ങളോട് പറയുന്നതെല്ലാം പച്ചക്കളളമാണെന്നും അദ്ദേഹം വിമർശിച്ചു.

ഒരു സംസ്ഥാനത്തിന്റെ മുഖ്യമന്ത്രി എന്നാൽ സത്യസന്ധനായിരിക്കണമെന്നും ജനങ്ങളുടെ രക്ഷകനായിരിക്കണമെന്നും അദ്ദേഹം വ്യക്തമാക്കി. പ്രതിപക്ഷ നേതാവ് രമേശ് ചെന്നിത്തലക്ക് വിഭ്രാന്തിയെന്നും പറയുന്നതെല്ലാം പച്ച നുണയാണെന്നും പറയാൻ മുഖ്യമന്ത്രിക്ക് എന്ത് ധാർമ്മിക കരുത്താണ് ഉളളതെന്നും വാർത്താസമ്മേളനത്തിൽ കെ സുധാകരൻ ചോദിച്ചു.

സ്വന്തം ജനങ്ങളോട് പച്ച നുണ പറഞ്ഞ ഇത്രയും അധപതിച്ച ഒരു മുഖ്യമന്ത്രിയെ ഉത്തരേന്ത്യൻ പോലുളള സംസ്ഥാനങ്ങളിൽ പോലും കാണാൻ കഴിയില്ലെന്നും അദ്ദേഹം കുറ്റപ്പെടുത്തി.

അതേസമയം കളളവോട്ട് തടയാൻ ശക്തമായ നിയമനടപടി സ്വീകരിക്കണം, ഹൈക്കോടതി വിധി ഉണ്ടായിരിക്കെ കളളവോട്ട് തടയാൻ സർക്കാർ മുന്നിട്ടിറങ്ങണമെന്നും അദ്ദേഹം ആവശ്യപ്പെട്ടു. കേരളത്തിലെ തെരഞ്ഞെടുപ്പിന്റെ സുതാര്യത നഷ്ടപ്പെട്ടെന്നും അദ്ദേഹം ആരോപിച്ചു.