കോഴിക്കോട് വനിതാ ഡോക്‌ടർ ഫ്ളാറ്റിൽ നിന്നും വീണുമരിച്ചു; സംഭവം ഇന്ന് പുലർച്ചെയോടെ

മേയർ ഭവന് സമീപം അപാർട്ട്മെന്റിൽ നിന്നും വനിതാ ഡോക്‌ടർ വീണുമരിച്ചു. ലിയോ പാരഡൈസ് അപാ‌ർട്ട്മെന്റിന്റെ 12ാം നിലയിൽ നിന്നും വീണാണ് ഡോ. സദാ റഹ്‌മത്ത് മരിച്ചത്. ഇന്ന് പുലർച്ചെ നാലുമണിയോടെയായിരുന്നു സംഭവം.

ഇവിടെ ഒരു പിറന്നാളാഘോഷത്തിനായാണ് സദാ എത്തിയത് എന്നാണ് വിവരം. നാല് മണിയോടെ ശബ്‌ദം കേട്ട് ഓടിയെത്തിയ അപാർട്ട്മെന്റിലെ സെക്യൂരിറ്റി ജീവനക്കാരനാണ് സദാ റഹ്‌മത്ത് വീണുകിടക്കുന്നത് കണ്ടത്.

ഉടൻ ഫ്ളാറ്റ് അധികൃതരെ വിവരമറിയിച്ചു. വേഗം കോഴിക്കോട് മെഡിക്കൽ കോളേജിലെത്തിച്ചെങ്കിലും ജീവൻ രക്ഷിക്കാനായില്ല. വെള്ളയിൽ പൊലീസ് സംഭവത്തെക്കുറിച്ച് അന്വേഷിക്കുകയാണ്. പൊലീസ് സംഭവസ്ഥലം സന്ദർശിച്ചു.