ദേശീയം
പോക്‌സോ കേസുകളിലെ വിവാദ വിധി; ജസ്‌റ്റിസ് പുഷ്‌പയെ ഒരു വര്‍ഷത്തേക്ക് മാത്രം അഡീഷണല്‍ ജഡ്ജിയായി തുടരാന്‍ അനുവദിച്ച്‌ കൊളീജിയം
തുടര്‍ച്ചയായി രണ്ടു പോക്‌സോ കേസുകളില്‍ പ്രസ്താവിച്ച ജസ്‌റ്റിസ് പുഷ്‌പ ഗനേജിവാലയ്‌ക്ക് ഒരു വര്ഷം കൂടി അഡീഷണല്‍ ജഡ്ജിയായി തുടരാന്‍ അനുമതി നല്‍കി സുപ്രീംകോടതി കൊളീജിയം. ബോംബെ ഹൈക്കോടതിയില്‍ അഡീഷണല്‍ ജഡ്‌ജിയായുള‌ള ജസ്‌റ്റിസ് പുഷ്‌പയുടെ കാലാവധി തീരുന്നത് വെള‌ളിയാഴ്‌ചയായിരുന്നു. ഇതിനുപിന്നാലെയാണ് ഇന്നുമുതല്‍ ഒരു വര്‍ഷത്തേക്ക് വീണ്ടും അഡീഷണല്‍ ജഡ്ജിയായി തുടരാന്‍ കൊളീജിയം തീരുമാനം വന്നത്.
വിവാദ ഉത്തരവുകളെ തുടര്‍ന്ന് സ്ഥിരം ജഡ്ജിയായി പുഷ്‌പയെ നിയമിക്കുന്നതിനുള‌ള അനുമതി കഴിഞ്ഞമാസം കൊളീജിയം പിന്‍വലിച്ചിരുന്നു. രണ്ട് വര്ഷം കൂടി അഡീഷണല്‍ ജഡ്ജിയായി തുടരാനും കൊളീജിയം ശുപാര്‍ശ ചെയ്‌തു. എന്നാല്‍ കേന്ദ്രസര്‍ക്കാര്‍ ഇടപെട്ടതോടെയാണ് ഇത് ഒരുവര്‍ഷമായി ചുരുക്കിയത്.
അഡീഷണല്‍ ജഡ്ജിയായി രണ്ട് വര്ഷം പൂര്‍ത്തിയാക്കുന്നവര്‍ പിന്നീട് സ്ഥിരം ജഡ്‌ജിമാരായി മാറുകയാണ് പതിവ്. എന്നാല്‍ രണ്ട് പോക്‌സോ കേസുകളില്‍ തുടര്‍ച്ചയായി വിവാദ ഉത്തരവ് പുറപ്പെടുവിച്ചതാണ് കൊളീജിയത്തിനെ മ‌റ്റൊരു തീരുമാനത്തെ കുറിച്ച്‌ ചിന്തിക്കാന്‍ ഇടയാക്കിയത്.
പന്ത്രണ്ട് വയസുകാരിയായ കുട്ടിയെ പീഡിപ്പിച്ച 39കാരന് സെഷന്‍സ് കോടതി നല്‍കിയ മൂന്ന് വര്ഷം തടവ് ശിക്ഷ റദ്ദാക്കിക്കൊണ്ടുള‌ള ഉത്തരവില്‍ ശരീരഭാഗങ്ങള്‍ പരസ്‌പരം ചേരാതെ ഒരു പെണ്‍കുട്ടിയുടെ മാറിടത്തില്‍ സ്‌പര്‍ശിക്കുന്നത് ലൈംഗിക അതിക്രമമല്ല എന്നായിരുന്നു ജസ്‌റ്റിസ് പുഷ്‌പയുടെ ആദ്യ വിവാദ വിധിപ്രസ്‌താവം. പീഡനത്തെ പ്രതിരോധിക്കുന്ന ഇരയെ വസ്‌ത്രമഴിച്ച്‌ ഒരാള്‍ക്ക് തനിയെ പീഡിപ്പിക്കാന്‍ സാധിക്കില്ലെന്നായിരുന്നു രണ്ടാമത്തെ വിവാദ വിധിപ്രസ്‌താവന. രണ്ട് വിധികളും ജനുവരി 27ന് സുപ്രീംകോടതി സ്‌റ്റേ ചെയ്‌തു. വിധി അപകടകരമായ കീഴ്‌വഴക്കങ്ങളുണ്ടാക്കുമെന്ന് അറ്റോര്‍ണി ജനറല്‍ കെ.കെ വേണുഗോപാല്‍ കോടതിയില്‍ അറിയിച്ചു.
ചീഫ് ജസ്‌റ്റിസ് എസ്.എ ബോബ്‌ഡെ, ജസ്‌റ്റിസുമാരായ എന്‍.വി രമണ, ആ‌ര്‍.എഫ് നരിമാന്‍ എന്നിവരാണ് സുപ്രീംകോടതി കൊളീജിയത്തിലെ അംഗങ്ങള്‍.
