പ്രവാസി വാർത്തകൾ
തൊഴില്‍ ഉടമയുടെ അനുമതി ഇല്ലാതെ രാജ്യം വിടാം; പുതിയ നിയമവുമായി സൗദി
തൊഴിലുടമയുടെ അനുമതി ഇല്ലാതെ തന്നെ രാജ്യം വിടാൻ സാധിക്കുന്ന പുതിയ നിയമവുമായി സൗദി അറേബ്യ. തൊഴിൽ കരാർ അവസാനിച്ചാൽ വിദേശികൾക്ക് സ്‌പോൺസറുടെ അനുമതി ഇല്ലാതെ തന്നെ വേറെ ജോലി കണ്ടെത്താനാവും. അടുത്ത മാർച്ചിൽ പ്രാബല്യത്തിൽ വരുന്ന നിയമത്തിലാണ് ഈ മാറ്റങ്ങൾ നിഷ്കർശിക്കുന്നത്
തൊഴിലാളികളും തൊഴിലുടമകളും തമ്മിലുള്ള ബന്ധം മെച്ചപ്പെടുത്തുന്നതിന്റെ ഭാഗമായാണ് പുതിയ നിയമം. വിദേശ തൊഴിലാളികൾക്ക് കൂടുതൽ അവകാശങ്ങൾ ഉറപ്പ് വരുത്തുന്നതാണ് 2021 മാർച്ച് 14നു പ്രാബല്യത്തിൽ വരുന്ന പുതിയ നിയമം. സ്വകാര്യ മേഖലയിൽ ജോലി ചെയ്യുന്ന വിദേശ തൊഴിലാളികൾക്ക് തൊഴിൽ കരാർ അവസാനിച്ചാൽ സ്‌പോൺസറുടെ അനുമതി ഇല്ലാതെ തന്നെ വേറെ ജോലി കണ്ടെത്തി സ്‌പോൺസർഷിപ്പ് മാറാൻ അനുവാദം നൽകുന്നു എന്നതാണു നിയമത്തിലെ പ്രധാനപ്പെട്ട ഒരു ഭേദഗതി. തൊഴിൽ കരാർ പുതുക്കാതെ സ്‌പോൺസറുടെ അനുമതി ഇല്ലാതെ ഫൈനൽ എക്‌സിറ്റ് അടിച്ചു സൗദിയിൽ നിന്നു മടങ്ങാനും തൊഴിലാളികൾക്ക് സാധിക്കും.
വിദേശ തൊഴിലാളികൾക്ക് സൗദിക്ക് പുറത്തു പോകാനുള്ള എക്‌സിറ്റ് റീഎൻട്രി സിസ്റ്റവും പുതിയ നിയമപ്രകാരം കൂടുതൽ സുതാര്യമാകും. തൊഴിലാളികൾക്ക് തന്നെ എക്‌സിറ്റ് റീഎൻട്രി അടിച്ചു രാജ്യത്തിന് പുറത്തു പോകാം. തൊഴിലാളി പുറത്തു പോകുമ്പോൾ ഇതുസംബന്ധമായ നോട്ടിഫിക്കേഷൻ സ്‌പോൺസർക്ക് ലഭിക്കും. അബ്ഷിർ ഖിവ പോർട്ടലുകൾ വഴി ഈ സേവനങ്ങൾ ലഭിക്കും. സ്വകാര്യ മേഖലയിലെ എല്ലാ പ്രവാസികൾക്കും ഇത് ബാധകമാണ്. എന്നാൽ, ഗാർഹിക തൊഴിലാളികൾക്ക് ബാധകമായിരിക്കില്ല. ഗാർഹിക തൊഴിലാളികളുമായി ബന്ധപ്പെട്ട പുതിയ നിയമങ്ങൾ പിന്നീട് പ്രഖ്യാപിക്കും.
അഭ്യന്തര മന്ത്രാലയം, ദേശീയ വിവര കേന്ദ്രം, മറ്റു നിരവധി സർക്കാർ ഏജൻസികൾ എന്നിവയുടെ പിന്തുണയോടെയാണ് പദ്ധതി നടപ്പാക്കുന്നത്. സ്വകാര്യമേഖലയിലെ പ്രതിനിധികളും സൗദി ചേംബർ ഓഫ് കൊമേഴ്‌സും തമ്മിൽ നിരവധി മീറ്റിങുകളും ശിൽപശാലകളും ഇതിനു മുന്നോടിയായി നടന്നതായും ബന്ധപ്പെട്ടവർ അറിയിച്ചു. രാജ്യാന്തര തലത്തിലെ മികച്ച തൊഴിൽ നിയമങ്ങളും സമ്പ്രദായങ്ങളും ഉൾക്കൊള്ളുകയും പഠനങ്ങളും ഗവേഷണങ്ങളും അടിസ്ഥാനമാക്കിയുള്ളതുമാണ് പുതിയ പരിഷ്കാരമെന്നു മന്ത്രാലയം അറിയിച്ചു.
