കേരളം
യുവമോർച്ച വനിത നേതാവിനെ വിവാഹവാഗ്ദാനം നൽകി പീഡിപ്പിച്ചു; ബിജെപി നേതാവിന്റെ മുൻ ഡ്രൈവർക്കെതിരെ കേസ്
യുവമോർച്ച വനിത നേതാവിനെ വിവാഹവാഗ്ദാനം നൽകി പീഡിപ്പിച്ചെന്ന പരാതിയിൽ ബിജെപി ജില്ലാ നേതാവിന്റെ മുൻ ഡ്രൈവർക്കെതിരെ കേസ്. പേരാമ്പ്ര കടിയങ്ങാട് സ്വദേശി സുജിത്തിനെതിരെയാണ് കേസ് എടുത്തത്. കുന്നമംഗലം സ്വദേശിയായ യുവതി നൽകിയ പരാതിയുടെ അടിസ്ഥാനത്തിലാണ് നടപടി.
കഴിഞ്ഞ തിരഞ്ഞെടുപ്പ് സമയത്താണ് യുവതി താത്ക്കാലിക ജോലിക്കായി ബിജെപി ജില്ലാ കമ്മിറ്റി ഓഫീസിലെത്തിയത്. ഇതിന് ശേഷം രാഷ്ട്രീയത്തിൽ സജീവമായിരുന്നു. പ്രതി യുവതിയുടെ ഫോട്ടോ പകർത്തി ഭീഷണിപ്പെടുത്തി സ്വർണാഭരണങ്ങളും പണവും തട്ടിയെടുത്തതായി പരാതിയിൽ പറയുന്നു. പ്രതി പ്രണയം നടിക്കുകയും വിവാഹവാഗ്ദാനം നൽകിയ ശേഷം യുവതിയെ പേരാമ്പ്രയിലെ വീട്ടിലെത്തിച്ച് പല തവണ പീഡിപ്പിച്ചതായും പരാതിയിൽ പറയുന്നു. പിന്നീട് ഇയാൾ ബിജെപി ജില്ലാ നേതാവിന്റെ ഡ്രൈവർ ജോലി ഉപേക്ഷിച്ച് പോയതായും യുവതി പറഞ്ഞു.
ആദ്യം അസിസ്റ്റന്റ് കമ്മിഷണർ കെ സുദർശന് നൽകിയ പരാതി കുന്നമംഗലം സ്റ്റേഷനിലേക്ക് കൈമാറുകയായിരുന്നു. സംഭവം നടന്നത് കൂത്താളിയിലായതിനാൽ കേസ് പേരാമ്പ്ര പൊലീസിന് കൈമാറുമെന്നും കമ്മിഷ്ണർ കെ സുദർശൻ പറഞ്ഞു.
