പ്രവാസി വാർത്തകൾ
യുഎഇലേക്കുള്ള യാത്രാവിലക്ക് തുടരും
ഇന്ത്യ ഉൾപ്പെടെ 16 രാജ്യങ്ങളില്‍ നിന്നുള്ള യാത്രക്കാരുടെ യുഎഇയിലേക്കുള്ള യാത്ര വിലക്ക് തുടരും. നിലവിലെ സ്ഥിതി തുടരുമെന്നും മറ്റൊരു അറിയിപ്പുണ്ടാകുന്നത് വരെ സർവീസ് ഉണ്ടാവില്ലെന്നുമാണ് യുഎഇ ജനറൽ സിവിൽ ഏവിയേഷൻ അതോറിറ്റി അധികൃതർ അറിയിച്ചത്.
പുതിയ ഉത്തരവിന്‍റെ പശ്ചാത്തലത്തിൽ ജൂലൈ 25വരെ സർവീസ് ഉണ്ടാകില്ലെന്ന് എമിറേറ്റ്സ് എയർലൈൻസ് അറിയിച്ചു. 31 വരെ സർവീസില്ലെന്ന് ഇത്തിഹാദ് എയർലൈൻസും വ്യക്തമാക്കി. ഇന്ത്യയിൽ കോവിഡ് രണ്ടാം തരംഗം വ്യാപിച്ചതോടെയാണ് യുഎഇ യാത്രാവിലക്ക് ഏർപ്പെടുത്തിയത്. ഏപ്രിൽ 24 ശനിയാഴ്ച മുതൽ പത്ത് ദിവസത്തേക്കാണ് യാത്രക്കാർക്ക് ആദ്യം വിലക്കേർപ്പെടുത്തിയത്. പിന്നീട് അത് മേയ് 14 വരെ നീട്ടി. നിലവിൽ മൂന്ന് മാസത്തോളമായി വിലക്ക് തുടരുന്നു.
ഇതോടെ, പെരുന്നാള്‍ അവധി കഴിയുന്നതോടെ യുഎഇയിലേക്ക് മടങ്ങിയെത്താമെന്ന മലയാളികള്‍ ഉള്‍പ്പെടെയുള്ള പ്രവാസികളുടെ പ്രതീക്ഷകള്‍ താല്‍ക്കാലികമായി അസ്തമിച്ചു. ഇന്ത്യക്ക് പുറമെ അഫ്ഗാനിസ്താന്‍, ബംഗ്ലാദേശ്, നേപ്പാള്‍, പാകിസ്താന്‍, ശ്രീലങ്ക തുടങ്ങിയ രാജ്യങ്ങളില്‍ നിന്നുള്ള യാത്രക്കാര്‍ക്ക് ഏര്‍പ്പെടുത്തിയ വിലക്ക് തുടരുമെന്നാണ് അധികൃതര്‍ അറിയിത്തിരിക്കുന്നത്. ഈ രാജ്യങ്ങളിലെ കൊവിഡ് വ്യാപനത്തിന്റെ അവസ്ഥ യുഎഇ സര്‍ക്കാര്‍ നിരീക്ഷിക്കുകയാണെന്നും അതിനനുസരിച്ചായിരിക്കും തുടര്‍ തീരുമാനമെന്നും സര്‍ക്കുലര്‍ വ്യക്താക്കി. അതേസമയം, ഈ രാജ്യങ്ങളില്‍ നിന്ന് യുഎഇ പൗരന്മാര്‍, നയതന്ത്ര പ്രതിനിധികള്‍, ഗോള്‍ഡന്‍ വിസയോ നിക്ഷേപക വിസയോ ഉള്ളവര്‍ എന്നിവര്‍ക്ക് യുഎഇ യാത്രയ്ക്ക് തടസ്സമില്ല.
16 രാജ്യക്കാര്‍ക്കുള്ള യാത്രാവിലക്ക് അനിശ്ചിതമായി നീട്ടിയ സാഹചര്യത്തില്‍ ഇന്ത്യയില്‍ നിന്നുള്ള പ്രവാസികള്‍ ഇപ്പോള്‍ വിമാന ടിക്കറ്റ് ബുക്ക് ചെയ്യാതിരിക്കുന്നതാണ് സുരക്ഷിതമെന്ന് ട്രാവല്‍ ഏജന്‍സി രംഗത്ത് പ്രവര്‍ത്തിക്കുന്നവര്‍ അറിയിച്ചു. മിക്ക വിമാന കമ്പനികളും റീഫണ്ട് അനുവദിക്കാതെയാണ് ടിക്കറ്റ് ബുക്കിംഗ് നല്‍കുന്നതെന്നും നിലവിലെ സാഹചര്യത്തില്‍ ടിക്കറ്റ് എടുക്കാതിരിക്കുന്നതാണ് ബുദ്ധിയെന്നും ദേര ട്രാവല്‍ ആന്റ് ടൂറിസ്റ്റ് ഏജന്‍സി വക്താവ് അറിയിച്ചു. ഒക്ടോബര്‍ ഒന്നോടെ ദുബായ് എക്‌സ്‌പോയ്ക്ക് തുടക്കമാകുമെന്നതിനാല്‍ അതിന് മുമ്പായി യാത്രാ വിലക്ക് നീക്കുമെന്ന പ്രതീക്ഷയിലാണ് തങ്ങളെന്നും പക്ഷെ, കൃത്യമായ തീയതി പറയാനാവുന്ന സ്ഥിതി ഇല്ലെന്നും റീഗല്‍ ടൂര്‍സ് പ്രതിനിധികളും അറിയിച്ചു.
