വനമേഖലയിൽ ടാങ്കറിൽ മാലിന്യവുമായെത്തിയവർ പിടിയിൽ

വനമേഖലയിൽ നിക്ഷേപിക്കാൻ കക്കൂസ് മാലിന്യവുമായെത്തിയ സംഘം വനപാലകരുടെ പിടിയിലായി.

പാങ്ങോട് ഭരതന്നൂർ സ്വദേശികളായ രഞ്ജിത്ത്, ശിവരാജൻ, മൈലമൂട് സ്വദേശി ഗണേശ് എന്നിവരാണ് പാലോട് വനംവകുപ്പുദ്യോഗസ്ഥരുടെ പിടിയിലായത്.

ചൊവ്വാഴ്ച രാത്രി പത്ത് മണിയോടെ പാലോട് റെയ്ഞ്ചിൽപ്പെട്ട കുന്താട് ഭാഗത്ത് ടാങ്കറിലെത്തിച്ച മാലിന്യം ഒഴുക്കിക്കളയുന്നതിനിടയിലാണ് പട്രോളിങ്ങിനെത്തിയ വനപാലകരുടെ കൈയിൽ സംഘം പെട്ടത്. ചോദ്യംചെയ്യലിൽ ചുള്ളിമാനൂരിലെ ഒരു വീട്ടിൽ നിന്നുള്ള മനുഷ്യ വിസർജ്യമാണെന്ന് ഇവർ സമ്മതിച്ചു.

ടാങ്കർ കസ്റ്റഡിയിലെടുത്തിട്ടുണ്ട്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.