കേരളം
കൊവിഡ് നിയന്ത്രണം; തലസ്ഥാനത്ത് കർശന പൊലീസ് പരിശോധന
സംസ്ഥാനത്ത് കൊവിഡ് രൂക്ഷമായ സാഹചര്യത്തിൽ കടുത്ത നിയന്ത്രണങ്ങളാണ് ഏർപ്പെടുത്തിയത്. കൊവിഡ് നിയന്ത്രണങ്ങള്‍ പാലിക്കുന്നത് ഉറപ്പാക്കാന്‍ തിരുവനന്തപുരത്ത് കര്‍ശന പൊലീസ് പരിശോധന നടക്കുകയാണ്. അനാവശ്യമായി പുറത്തിറങ്ങിയവരില്‍ നിന്ന് പിഴയീടാക്കുകയും കേസെടുക്കുകയും ചെയ്തു.
പൊതുവില്‍ ജനം നിയന്ത്രണം പാലിച്ചു. ഞായറാഴ്ചയായതിനാല്‍ വിവാഹാവശ്യത്തിനായിരുന്നു വാഹനങ്ങള്‍ കൂടുതലും നിരത്തിലിറങ്ങിയത്. കര്‍ശനമായിരുന്നു പൊലീസ് നിലപാട്. വാഹനങ്ങളെല്ലാം തടഞ്ഞ് പരിശോധിച്ചു. ഞായറാഴ്ച ദിവസം നിരവധി വിവാഹങ്ങളുണ്ടായിരുന്നത് പൊലീസിന്‍റെ ജോലിഭാരം കൂട്ടി.
ക്ഷണപത്രത്തിലെ തീയതിയടക്കം കൃത്യമായി പരിശോധിച്ച ശേഷമാണ് വാഹനങ്ങള്‍ കടത്തിവിട്ടത്. വിവാഹാവശ്യത്തിന് പോകുന്ന ബസുകള്‍ക്കുള്ളില്‍ ആളുകള്‍ നിയന്ത്രണങ്ങള്‍ പാലിക്കുന്നുണ്ടോ എന്നും പരിശോധിച്ചു.
പലയിടത്തും അനാവശ്യമായി പുറത്തിറങ്ങിയവരുടെ വാഹനങ്ങള്‍ പിടിച്ചുവയ്ക്കുകയും കേസെടുക്കുകയും ചെയ്തു. നാലുപേരില്‍ കൂടുതല്‍ സഞ്ചരിച്ച കാറുകളും തടഞ്ഞു. കെ.എസ്.ആര്‍.ടി.സി ബസുകളില്‍ യാത്രക്കാര്‍ വളരെ കുറവായിരുന്നു. ഹോട്ടലുകളും അവശ്യവസ്തുക്കള്‍ വില്‍ക്കുന്ന കടകളും മാത്രമാണ് തുറന്ന് പ്രവർത്തിക്കുന്നത്.
