കിടപ്പുരോഗിയെ വീട്ടിൽകയറി തെരുവുനായ ആക്രമിച്ചു; കൈയിൽ അഞ്ച് മുറിവുകൾ

കിടപ്പിലായ വൃക്കരോ​ഗിയെ വീടിനുള്ളിൽ കയറി തെരുവുനായ ആക്രമിച്ചു. ​ഗുരുതരമായി പരിക്കേറ്റ കൊടുമ്പ് ഒലശ്ശേരിയിൽ 71കാരനായ കുട്ടിയപ്പനെ ജില്ലാ ആശുപത്രിയിൽ പ്രവേശിപ്പിച്ചു. വിരലിലും കൈപ്പത്തിക്ക് താഴെയുമായി ആഴത്തിലുള്ള അഞ്ച് മുറിവുകളുണ്ട്.

‌ഇന്നലെ രാത്രി എട്ട് മണിക്കാണ് സംഭവം. തുറന്നിട്ട വാതിലിലൂടെ മുറിക്കകത്ത് കയറിയാണ് നായ കുട്ടിയപ്പനെ ആക്രമിച്ചത്. മ‌കനും ഭാര്യയും ഈ സമയം വീട്ടിലുണ്ടായിരുന്നില്ല. മരുമകൾ കുഞ്ഞിനൊപ്പം ശുചിമുറിയിലായിരുന്നു.

നായയെ കണ്ട് പരിഭ്രമിച്ച കുട്ടിയപ്പൻ കൈകൊണ്ട് ഓടിക്കാൻ ശ്രമിക്കുന്നതിനിടെ നായ ഇടുതുകൈയിൽ കടിക്കുകയായിരുന്നു. ബഹളം കേട്ട് ഓടിയെത്തിയ മരുമകളും നാട്ടുകാരും ചേർന്നാണ് നായയെ വീടിനുള്ളിൽ നിന്ന് പുറത്താക്കിയത്. കുട്ടിയപ്പനെ ഉടൻ ജില്ലാ ആശുപത്രിയിൽ പ്രവേശിപ്പിച്ചു. ‍