കേരളം
സെബി ആക്റ്റ് പ്രകാരം കുറ്റം ചുമത്താന് സെബിയുടെ അനുമതി ആവശ്യമില്ലെന്ന് സുപ്രീംകോടതി
സെബി ആക്റ്റ് 24 എ വകുപ്പ് പ്രകാരമുള്ള കുറ്റം ചുമത്തുന്നതിന് സെബിയുടെ അനുമതി നിര്ബന്ധമല്ലെന്ന് സുപ്രീംകോടതി. എന്നാല്, ഈ വകുപ്പ് ചുമത്തുന്ന വിഷയത്തില് കോടതികളും സെക്യൂരിറ്റീസ് അപ്പലേറ്റ് ട്രൈബ്യൂണലുകളും സെബിയുടെ ഉപദേശം തേടണമെന്നും ജസ്റ്റിസുമാരായ ഡി വൈ ചന്ദ്രചൂഡ്, എം ആര് ഷാ എന്നിവര് അംഗങ്ങളായ ബെഞ്ച് നിരീക്ഷിച്ചു.
സെബി ആക്റ്റിലെ വ്യവസ്ഥകള് ലംഘിച്ചതിന് വിചാരണ നേരിടുന്ന പ്രകാശ് ഗുപ്ത നല്കിയ അപ്പീലിലാണ് സുപ്രീംകോടതി നിരീക്ഷണം. വാരാണസിയിലെ ഹോട്ടല് ശൃംഖലയുടെ ഡയറക്ടറായ പ്രകാശ്ഗുപ്ത കമ്ബനിയുടെ ഓഹരിവില്പ്പനയില് ക്രമക്കേട് കാണിച്ച് നിക്ഷേപകരുടെ താല്പ്പര്യങ്ങള് വഞ്ചിച്ചെന്നാണ് കേസ്.
സെബി ആക്റ്റ് പ്രകാരമുള്ള കുറ്റങ്ങള് ചുമത്തുന്നതിന് കോടതികള്ക്കും സെക്യൂരിറ്റി അപ്പലേറ്റ് ട്രൈബ്യൂണലുകള്ക്കും അധികാരമുണ്ട്.എന്നാല്, ഈ വിഷയത്തില് സെബി പുറപ്പെടുവിച്ചിട്ടുള്ള മാര്ഗനിര്ദേശങ്ങള് കണക്കിലെടുക്കണമെന്ന് സുപ്രീംകോടതി നിര്ദേശിച്ചു. സെബി ആക്റ്റ് പ്രകാരമുള്ള കുറ്റം ചുമത്തുന്നതിന് മുൻപ് സെബിയുടെ അനുമതി നിര്ബന്ധമാണെന്നായിരുന്നു ഹര്ജിക്കാരന്റെ അവകാശവാദം.
സ്റ്റോക്ക് മാര്ക്കറ്റ് പ്രവര്ത്തനങ്ങള് നിയന്ത്രിക്കുകയും നിക്ഷേപകരുടെ താല്പ്പര്യങ്ങള് സംരക്ഷിക്കുകയുമാണ് സെബി എന്ന ചുരുക്കപ്പേരില് അറിയപ്പെടുന്ന സെക്യൂരിറ്റീസ് ആന്ഡ് എക്ചേഞ്ച് ബോര്ഡ് ഓഫ് ഇന്ത്യയുടെ കര്ത്തവ്യം.