കേരളം
കേരള സർവകലാശാല അറിയിപ്പുകൾ
ഒക്ടോബർ നാലു മുതൽ ഓഫ് ലൈൻ ക്ലാസുകൾ നടത്താനായി കേരള സർവകലാശാല പഠനവകുപ്പുകളും അഫിലിയേറ്റഡ് കോളേജുകളും ഒരുക്കങ്ങൾ ആരംഭിച്ചു. കോളേജുകളിൽ അഞ്ചാം സെമസ്റ്റർ യു.ജി., മൂന്നാം സെമസ്റ്റർ പി.ജി. എന്നീ ക്ലാസുകൾക്കായിരിക്കും തുടക്കത്തിൽ ഓഫ് ലൈൻ ക്ലാസുകൾ നടത്തുക. കോളേജ് തല ജാഗ്രതാസമിതികൾ രൂപവത്കരിക്കാനും ഓൺലൈൻ, ഓഫ് ലൈൻ ക്ലാസുകൾക്ക് വേണ്ടി പ്രത്യേക ടൈംടേബിൾ രൂപവത്കരിക്കാനും തീരുമാനിച്ചു. അധ്യാപകരുടേയും രക്ഷാകർതൃ സമിതിയുടേയും യോഗങ്ങൾ നടത്തി വേണ്ട നടപടികൾ കൈക്കൊള്ളാൻ പ്രിൻസിപ്പൽമാരെ യോഗം ചുമതലപ്പെടുത്തി.
പ്രിൻസിപ്പൽമാരുടെ അഭിപ്രായം മാനിച്ച് ഒക്ടോബർ 4 ന് തുടങ്ങുന്ന ആദ്യ സെമസ്റ്റർ പരീക്ഷ മാറ്റിവെയ്ക്കാനും തീരുമാനിച്ചു. പ്രോവൈസ് ചാൻസലർ ഡോ.പി.പി.അജയകുമാറിന്റെ അധ്യക്ഷതയിൽ കൂടിയ പ്രിൻസിപ്പൽമാരുടെ യോഗം കോവിഡ് പ്രോട്ടോക്കോൾ പാലിച്ച് ക്ലാസുകൾ നടത്തുന്നതിനുവേണ്ട തയ്യാറെടുപ്പുകൾ നടത്താൻ തീരുമാനിച്ചു. സിൻഡിക്കേറ്റ് അംഗങ്ങളായ കെ.എച്ച്.ബാബുജാൻ, എ.അജികുമാർ എന്നിവരും യോഗത്തിൽ സംബന്ധിച്ചു.
പരീക്ഷാഫലം
കേരള സർവകലാശാല 2021 ഓഗസ്റ്റിൽ നടത്തിയ ബി.കോം. ആന്വൽസ്‌കീം പ്രൈവറ്റ് സപ്ലിമെന്ററി ആൻഡ്‌ ഫൈനൽ ഇയർ ഒൺലി പരീക്ഷാഫലം പ്രസിദ്ധീകരിച്ചു.
പുനർമൂല്യനിർണയത്തിനും സൂക്ഷ്മപരിശോധനയ്ക്കും ഓൺലൈനായും ഓഫ്‌ലൈനായും ഒക്ടോബർ എട്ടു വരെ അപേക്ഷിക്കാം. വിശദവിവരങ്ങൾ വെബ്‌സൈറ്റിൽ.
പുതുക്കിയ പരീക്ഷാത്തീയതി
കേരള സർവകലാശാല ഒക്ടോബർ 4 ന് നടത്താൻ നിശ്ചയിച്ചിരുന്ന ഒന്നാം സെമസ്റ്റർ സി.ബി.സി.എസ്.എസ്./സി.ആർ. പരീക്ഷകൾ ഒക്ടോബർ 25 ലേക്ക് പുനഃക്രമീകരിച്ചിരിക്കുന്നു. മറ്റു പരീക്ഷകൾക്ക് മാറ്റമില്ല.
