കേരളം
മോണ്‍സനെതിരെയുള്ള ഇന്‍റലിജന്‍സ് റിപ്പോര്‍ട്ട് പുറത്ത്; ക്രൈംബ്രാഞ്ചിന് നാളെ തെളിവുകള്‍ കൈമാറുമെന്ന് പരാതിക്കാര്‍
പുരാവസ്തു തട്ടിപ്പുകേസിലെ പ്രതി മോണ്‍സണ്‍ മാവുങ്കിലിനെതിരെയുള്ള ഇന്‍റലിജന്‍സ് റിപ്പോര്‍ട്ട് പുറത്ത്. 2020ലെ റിപ്പോര്‍ട്ട് പകര്‍പ്പ് അടക്കമാണ് പുറത്തായത്. മോണ്‍സണിന്റെ സാമ്ബത്തിക ഇടപാടുകളില്‍ അടക്കം ദുരൂഹതയുണ്ടെന്നും രാഷ്ട്രീയ, ഉദ്യോഗതലങ്ങളിലെ ഉന്നതരുമായി ബന്ധമുണ്ടെന്നും സിനിമാമേഖലയില്‍ ഉള്ളവരുമായി അടുപ്പമുണ്ടെന്നും റിപ്പോര്‍ട്ടിലുണ്ടായിരുന്നു.
പുരാവസ്തു വില്‍പനാ ലൈസന്‍സ് ഉണ്ടായിരുന്നോവെന്ന സംശയവും റിപ്പോര്‍ട്ട് ഉയര്‍ത്തിയിരുന്നു. ഇതിന്റെ തുടര്‍ച്ചയായി വിശദമായ അന്വേഷണം വേണമെന്ന് മുന്‍ ഡിജിപി ലോക്‌നാഥ് ബെഹ്‌റ ഇഡിയോട് ശുപാര്‍ശ ചെയ്തിരുന്നു. ഇതിനിടെ, ഉന്നതര്‍ ഇടപെട്ട രേഖകളടക്കമുള്ള തെളിവുകള്‍ നാളെ ക്രൈംബ്രാഞ്ചിന് കൈമാറുമെന്ന് കേസിലെ പരാതിക്കാരായ അനൂപ് അഹമ്മദ്, എം.ടി. ഷമീര്‍, യാക്കൂബ് എന്നിവര്‍ മാധ്യമങ്ങളോട് പറഞ്ഞു. ജൂലൈ മൂന്നിന് പരാതി കൊടുത്തിട്ടുണ്ടെന്നും കൂടുതല്‍ ആളുകള്‍ പരാതിയുമായി വന്നിട്ടുണ്ടെന്നും അവര്‍ പറഞ്ഞു.
സിനിമ രംഗത്ത് ഉള്ള ഒരുപാട് പേര്‍ക്കു മോണ്‍സണുമായി ബന്ധമുണ്ട്. ചേര്‍ത്തല സി.ഐ ഇടപെട്ടതിന്റെ രേഖകള്‍ ഉണ്ടെന്നും കെ.പി.സി.സി പ്രസിഡന്‍റ് കെ. സുധാകരന് തട്ടിപ്പില്‍ പങ്കുണ്ടോ ഇല്ലയോ എന്നത് അന്വേഷണ സംഘം കണ്ടെത്തട്ടേയെന്നും അവര്‍ പറഞ്ഞു. സുധാകരന്റെ കൂടെ എടുത്ത ഫോട്ടോ 2018 നവംബര്‍ 22 ന് ഉള്ളതാണെന്നും പറഞ്ഞു. ഡി.ഐ.ജിയുടെ വീട്ടില്‍ വച്ചാണ് പണം കൊടുത്തതെന്ന് യാക്കൂബ് പറഞ്ഞു.
പണം നല്‍കിയ ദിവസത്തില്‍ എം.ഐ ഷാനവാസിന്റെ സംസ്‌കാര ചടങ്ങില്‍ ആയിരുന്നുവെന്നു സുധാകരന് പറയുന്നത് തെറ്റാണെന്നും അദ്ദേഹം അവിടെ മുഴുസമയം ഉണ്ടായിരുന്നെന്നും സുധാകരനോട് രാഷ്ട്രീയമാണ് സംസാരിച്ചതെന്നും അനൂപ് പറഞ്ഞു. സുധാകരന്റെ സാന്നിധ്യത്തിലാണ് മോണ്‍സണ്‍ സംസാരിച്ചതെന്നും അദ്ദേഹം പറഞ്ഞു. പരാതി നല്‍കാനായി മുഖ്യമന്ത്രിയുടെ ഓഫീസില്‍ പോയിട്ടുണ്ടെന്നും പരാതി അട്ടിമറിക്കപ്പെടുമോ എന്ന് ആശങ്ക വന്നപ്പോള്‍ കെ.കെ രാഗേഷിനെ വിളിച്ചിട്ടുണ്ടെന്നും അതില്‍ മറ്റൊരു ഗൂഢാലോചനയുമില്ലെന്നും അദ്ദേഹം പറഞ്ഞു.
