പ്രവർത്തി ദിനത്തിൽ കൂട്ട അവധിയെടുത്ത് ടൂർ; സംഭവം കോന്നി താലൂക്ക് ഓഫീസിൽ

ജീവനക്കാര്‍ കൂട്ട അവധിയെടുത്ത് വിനോദയാത്രക്ക് പോയതോടെ കോന്നി താലൂക്ക് ഓഫീസിലെ റവന്യൂ വിഭാഗത്തിന്റെ പ്രവർത്തനം സ്തംഭിച്ചു. ഓഫീസിലെ 39 ജീവനക്കാരാണ് കൂട്ടത്തോടെ മുങ്ങിയിരിക്കുന്നത്. താലൂക്ക് തഹസീൽദാരെയും കാണാനില്ല. താലൂക്ക് ഓഫീസിലെ റവന്യൂ വിഭാഗത്തിലെ ജീവനക്കാരാണ് കൂട്ടത്തോടെ മൂന്നാറിലേക്ക് വിനോദയാത്രയ്ക്ക് പോയത്.

ഓഫീസിലെത്തിയ ജനങ്ങള്‍ കഷ്ടത്തിലായി. സംഭവം നാട്ടുകാർ അറിയിച്ചതിനെ തുടർന്ന് കോന്നി എംഎല്‍എ ജനീഷ് കുമാര്‍ താലൂക്ക് ഓഫീസിലെത്തി. താലൂക്ക് ഓഫീസിലെ 60 ജീവനക്കാരിൽ 21 പേരാണ് വെള്ളിയാഴ്ച ഒപ്പിട്ടിട്ടുള്ളതെന്ന് ജനീഷ് കുമാര്‍ എംഎല്‍എ പറഞ്ഞു. ബാക്കിവരുന്ന 39 പേര്‍ വെള്ളിയാഴ്ച ഓഫീസിലെത്തിയില്ല. താലൂക്ക് തഹസില്‍ദാറുടെ നേതൃത്വത്തില്‍ ആണ് റവന്യൂ വിഭാഗം ജീവനക്കാർ ഒന്നടങ്കം നാട്ടുകാരെ ആകെ വലച്ചു കൊണ്ട് വിനോദയാത്രയ്ക്ക് പോയിരിക്കുന്നത്. രണ്ടാംശനിയാഴ്ചയും, ഞായറാഴ്ചയും കൂടി കണക്കിലെടുത്ത് മൂന്നു ദിവസത്തെ ടൂറിന് ആണ് ഇവർ പോയിരിക്കുന്നത്.

ഓഫീസിന്റെ അവസ്ഥ ജനീഷ് കുമാര്‍ എംഎല്‍എ റവന്യൂമന്ത്രിയെയും റവന്യൂ സെക്രട്ടറിയെയും അറിയിച്ചിട്ടുണ്ട്. സംഭവത്തില്‍ ഇടപെടാമെന്ന് മന്ത്രി അറിയിച്ചതായും ജനീഷ് കുമാര്‍ പറഞ്ഞു. വെള്ളിയാഴ്ച വരാത്തവരുടെയെല്ലാം അവധി രേഖപ്പെടുത്താന്‍ എംഎല്‍എ നിര്‍ദേശം നല്‍കി. അഞ്ചോ പത്തോ പേരല്ല, 39 പേര്‍ ആണ്കൂട്ടത്തോടെ അവധിയെടുത്തിരിക്കുന്നത്.

റവന്യൂ മന്ത്രി നിര്‍ദേശിച്ച് നടത്താൻ നിർദേശിച്ചിരുന്ന അടിയന്തരയോഗം മറ്റൊരു കാര്യം പറഞ്ഞ് ജീവനക്കാര്‍ മാറ്റിവെക്കുക കൂടി ചെയ്താണ് ജീവനക്കാർ ട്യൂറിനു പോയിരിക്കുന്നത്. ഓഫീസിൽ ഇന്ന് എത്താതിരുന്ന 17 പേര്‍ മാത്രമാണ് ലീവ് നല്‍കിയിട്ടുള്ളത്. ബാക്കിയുള്ളവര്‍ ലീവ് അപേക്ഷ പോലും നല്‍കാതെ മുങ്ങിയിരിക്കുകയാണ്. തഹസീൽദാർ കൂടി ഒപ്പമുള്ളതിനാൽ ധിക്കാരവും ധാര്‍ഷ്ട്യവും നിറഞ്ഞ നടപടിയാണ് ജീവനക്കാർ കാട്ടിയിരിക്കുന്നത്. അനധികൃതമായിട്ടാണ് ഇത്രയേറെ പേര്‍ ലീവെടുത്തിട്ടുള്ളത്.

സംഭവത്തിൽ ‘ഒരു ദാക്ഷിണ്യവും ഉണ്ടാകില്ല. സര്‍ക്കാര്‍ കര്‍ശന നടപടി സ്വീകരിക്കും’ ജനീഷ് കുമാര്‍ എംഎല്‍എ പറഞ്ഞു. അതേസമയം അവധിയെടുത്താണ് ജീവനക്കാര്‍ പോയതെന്നാണ് തഹസില്‍ദാരുടെ വിശദീകരണം. ഓഫീസ് പ്രവര്‍ത്തനം തടസ്സപ്പെടാതിരിക്കാന്‍ പകരം സംവിധാനം ഏര്‍പ്പെടുത്തിയിട്ടുണ്ടെന്നാണ് തഹസില്‍ദാർ നൽകുന്ന വിശദീകരണം.