കേരളം
സെക്രട്ടറിയേറ്റിൽ കൊറോണ വ്യാപനം രൂക്ഷം; ഡവലപ്പ്മെന്റ് ഹാൾ അടച്ചിട്ടു
സെക്രട്ടറിയേറ്റിൽ കൊറോണ വ്യാപനം രൂക്ഷമെന്ന് റിപ്പോർട്ടുകൾ. സെക്രട്ടറിയേറ്റിലെ ധനവകുപ്പിന് കീഴിലെ ഡവലപ്പ്മെന്റ് ഹാൾ കൊറോണ വ്യാപനത്തെ തുടർന്ന് അടച്ചിട്ടു. ധനവകുപ്പിലെ പകുതിയിലധികം ജീവനക്കാർ ജോലിചെയ്യുന്ന സെന്ററാണ് ഡവലപ്പ്മെന്റ് ഹാൾ.
കൊറോണ മാനദണ്ഡങ്ങൾ പാലിക്കാതെ സെക്രട്ടറിയേറ്റിലെ ക്യാൻറീൻ തെരഞ്ഞെടുപ്പ് നടത്തിയതാണ് വൈറസ് വ്യാപനത്തിന് കാരണമായതെന്നാണ് ആക്ഷേപം.
കൊറോണ മാനദണ്ഡങ്ങൾ കർശനമായി പാലിക്കണമെന്ന് സർക്കാർ ആവശ്യപ്പെടുമ്പോഴാണ് ഭരണ സിരാ കേന്ദ്രത്തിൽ ഇത് അട്ടിമറിക്കപ്പെടുന്നത്. സെക്രട്ടറിയേറ്റിനുള്ളിലെ ജീവനക്കാർക്കിടയിൽ കൊറോണ വ്യാപിക്കുകയാണ്. ഇന്നുമുതൽ ധനവകുപ്പിന് കീഴിലെ ഡവലപ്പ്മെന്റ് ഹാൾ കൊറോണ വ്യാപനത്തെ തുടർന്ന് അടച്ചിടും.
സെക്രട്ടറിയേറ്റിനുള്ളിൽ തന്നെ കൊറോണ മാനദണ്ഡങ്ങൾ അട്ടിമറിക്കുമ്പോൾ ഇടത്പക്ഷ യൂണിയൻറെ അപ്രമാധിത്യത്തിൽ മറ്റ് ജീവനക്കാർക്ക് പ്രതികരിക്കാൻ കഴിയാത്ത സാഹചര്യമാണ് ഇപ്പോഴുള്ളത്.
എത്ര പേര്ക്കാണ് കോവിഡ് സ്ഥിരീകരിച്ചതെന്ന് ജീവനക്കാരെ അറിയിച്ചിട്ടില്ല. അണുനശീകരണത്തിന് ശേഷം മാത്രമാകും ഓഫീസുകള് വീണ്ടും തുറക്കുക എന്നാണ് വ്യക്തമാക്കുന്നത്.