കേരളം
മന്ത്രി ജി സുധാകരനെതിരായ തെളിവുകൾ ഹാജരാക്കി പരാതിക്കാരി
മന്ത്രി ജി സുധാകരനെതിരായ പരാതിയിൽ തെളിവ് ഹാജരാക്കി പരാതിക്കാരി. കേസിനാധാരമായ ദൃശ്യങ്ങളാണ് പൊലീസിന് കൈമാറിയത്. മന്ത്രിയുടെ മുൻ പേഴ്സണൽ സ്റ്റാഫ് അംഗത്തിന്റെ ഭാര്യ ആണ് പരാതി നൽകിയത്.
സ്ത്രീ വിരുദ്ധ പരാമർശം മന്ത്രി നടത്തിയെന്നായിരുന്നു പരാതി. ഇതിന് ആധാരമായ തെളിവുകളാണ് ഇപ്പോൾ പൊലീസിന് നൽകിയത്. പൊലീസ് പരാതിക്കാരിയോട് ദൃശ്യങ്ങൾ നൽകണമെന്ന് ആവശ്യപ്പെട്ടിരുന്നു. ആലപ്പുഴയിൽ ഒരു സ്വകാര്യ ഹോട്ടലിൽ വെച്ച് നടത്തിയ വാർത്താസമ്മേളനത്തിൽ ആണ് സ്ത്രീ വിരുദ്ധ പരാമർശം മന്ത്രി നടത്തിയതെന്നാണ് ആരോപണം.
അതേസമയം തനിക്കെതിരായ ആരോപണങ്ങൾ അടിസ്ഥാനരഹിതമാണെന്നും ഇതിനു പിന്നിൽ മറ്റ് ലക്ഷ്യങ്ങളാണുള്ളതെന്നും മന്ത്രി ജി.സുധാകരൻ പ്രതികരിച്ചു. പരാതിക്കാരിയായ മുൻ പേഴ്സണൽ സ്റ്റാഫംഗത്തിന്റെ ഭാര്യ പൊലീസിൽ പരാതി നൽകിയതിനു വേറെ ലക്ഷ്യങ്ങളുണ്ട്.
പരാതി ഉന്നയിച്ച പേഴ്സണൽ സ്റ്റാഫിന്റെ ഭാര്യയെ തനിക്ക് അറിയില്ല. സ്റ്റാഫ് അംഗം ജോലിക്ക് കൃത്യമായി ഹാജരായിരുന്നില്ല. തനിക്കെതിരെ അവരെ ഉപയോഗിച്ചു എന്നാണ് താൻ പറഞ്ഞത്. താൻ സ്ത്രീവിരുദ്ധ പരാമർശം നടത്തിയിട്ടില്ല. ആരെയും മോശമായി പറഞ്ഞിട്ടില്ലെന്നും അദ്ദേഹം വ്യക്തമാക്കി.
