കേരളം
ഇപിഎഫ് അക്കൗണ്ടുമായി പാന്‍ ബന്ധിപ്പിച്ചാൽ ഇരട്ടി ടിഡിഎസ്; റിട്ടേണ്‍ ഫയല്‍ ചെയ്യാന്‍ വൈകിയാല്‍ പ്രതിദിനം 200 രൂപ പിഴ
എംപ്ലോയീസ് പ്രോവിഡന്റ് ഫണ്ട് അക്കൗണ്ടുമായി ‘പാന്‍’ ബന്ധിപ്പിക്കാത്തവര്‍ക്ക് ഇരട്ടി ടിഡിഎസ്. പ്രതിവര്‍ഷം രണ്ടര ലക്ഷത്തിലധികം രൂപ ഇപിഎഫ് അക്കൗണ്ടില്‍ നിക്ഷപിക്കുന്നവര്‍ പലിശ വരുമാനത്തിന്റെ 20% ടിഡിഎസ് (സ്രോതസ്സില്‍നിന്ന് ഈടാക്കുന്ന ആദായനികുതി) നല്‍കണമെന്ന് ഇപിഎഫ്ഒ അറിയിച്ചു.ഇനി എടിഎമ്മില്‍നിന്നു പണം പിന്‍വലിക്കാന്‍ കാര്‍ഡ് വേണ്ട; പ്രഖ്യാപനവുമായി ആര്‍ബിഐ പാന്‍ ബന്ധിപ്പിച്ചിട്ടുണ്ടെങ്കില്‍ 10% ടിഡിഎസ് ആകും ഈടാക്കുക.
ടിഡിഎസ് ഈടാക്കിയാലും ഇല്ലെങ്കിലും പലിശവരുമാനം നികുതിദായകരുടെ മൊത്തം വരുമാനത്തില്‍ ചേര്‍ത്താകും അന്തിമ ആദായനികുതി കണക്കാക്കുക. 2.5 ലക്ഷത്തിലധികം രൂപ നിക്ഷേപിക്കുന്നവര്‍ക്കു നികുതി ഏര്‍പ്പെടുത്തുമെന്നു കഴിഞ്ഞ വര്‍ഷത്തെ കേന്ദ്ര ബജറ്റിലാണു പ്രഖ്യാപിച്ചത്. ഈ മാസം 6ന് ഇപിഎഫ്ഒ ഇറക്കിയ മാര്‍ഗരേഖയിലാണു പുതിയ നിര്‍ദേശങ്ങളുള്ളത്.
തൊഴില്‍ദാതാവിന്റെ വിഹിതമുള്ളവര്‍ക്ക് ( സ്വകാര്യമേഖല) പ്രതിവര്‍ഷം 2.5 ലക്ഷം രൂപയ്ക്കു മുകളിലുള്ള നിക്ഷേപത്തിന്റെ പലിശയ്ക്കു നികുതി ചുമത്തും. തൊഴില്‍ദാതാവിന്റെ വിഹിതമില്ലെങ്കില്‍ (സര്‍ക്കാര്‍ മേഖല) 5 ലക്ഷം രൂപയ്ക്കു മുകളിലുള്ള തുകയുടെ പലിശയ്ക്കാണു നികുതി. വിദേശത്തായിട്ടും ഇന്ത്യയില്‍ സജീവമായ ഇപിഎഫ് അക്കൗണ്ട് ഉള്ളവരില്‍നിന്ന് 30% ആയിരിക്കും ടിഡിഎസ് ഈടാക്കുക.
തൊഴില്‍ദാതാവിന്റെ വിഹിതമുള്ളവരാണെങ്കില്‍ ഒരു വര്‍ഷം അക്കൗണ്ടിലെത്തുന്ന 2.5 ലക്ഷം രൂപ വരെ ഒരു അക്കൗണ്ടിലായിരിക്കും കണക്കാക്കുക. ഇതിന്റെ പലിശയ്ക്കു നികുതി ബാധകമല്ല. ആ വര്‍ഷം അധികമായെത്തുന്ന തുക പ്രധാന പിഎഫ് അക്കൗണ്ടിനു കീഴില്‍ രണ്ടാമതൊരു അക്കൗണ്ട് സൃഷ്ടിച്ച് അതിലേക്കു മാറ്റി നികുതി കണക്കാക്കും.
നടപ്പുസാമ്പത്തികവര്‍ഷത്തിന്റെ ആദ്യ പാദത്തിലെ ടിഡിഎസ് റിട്ടേണ്‍ ജൂലൈ 31നകം ഫയല്‍ ചെയ്യണം. രണ്ടാമത്തെ പാദത്തിന്റേത് ഒക്ടോബര്‍ 31നകവും ഒക്ടോബര്‍- ഡിസംബര്‍ കാലയളവിലേത് ജനുവരി 31നകവും അവസാന പാദത്തിലേത് മെയ് 31നകവും ഫയല്‍ ചെയ്യണമെന്നാണ് നിര്‍ദേശം. ടിഡിഎസ് റിട്ടേണ്‍ സമര്‍പ്പിച്ചില്ലായെങ്കില്‍ പ്രതിദിനം 200 രൂപ പിഴയായി ഈടാക്കും.
