ക്രൈം
ബ്ലാക്ക് ഫംഗസ് വ്യാജ ഇഞ്ചക്ഷന്‍; റെയിഡില്‍ കണ്ടെത്തിയത് 3000ത്തിലധികം കുപ്പികള്‍
ബ്ലാക്ക് ഫംഗസ് ചികിത്സയ്ക്ക് ഉപയോഗിക്കുന്ന ലിപ്‌സോമാള്‍ ആംഫോട്ടെറിസിന്‍-ബി കുത്തിവയ്പുകള്‍ അനധികൃതമായി നിര്‍മ്മിച്ചു വിറ്റിരുന്ന സംഘം പിടിയില്‍. രണ്ട് ഡോക്ടര്‍മാരടങ്ങുന്ന പത്തംഗ സംഘത്തെയാണ് ഡല്‍ഹി പൊലീസ് അറസ്റ്റ് ചെയ്തത്.
വ്യാജ ഇഞ്ചക്ഷനുള്ള 3,293 മരുന്നുകുപ്പികള്‍ ഇവരില്‍ നിന്ന് കണ്ടെടുത്തു.
ഡോ.അല്‍ത്മാസ് ഹുസൈന്റെ വീട്ടില്‍ ക്രൈംബ്രാഞ്ച് സംഘം നടത്തിയ റെയിഡിലാണ് മരുന്നുകള്‍ പിടിച്ചെടുത്തത്. ഇവയില്‍ ഭൂരിഭാഗവും ബ്ലാക്ക് ഫംഗസ് ചികിത്സയ്ക്ക് ഉപയോഗിക്കുന്നതാണെന്നും റെംഡിസെവര്‍ ഇഞ്ചെക്ഷനുകളും ഇക്കുട്ടത്തില്‍ ഉണ്ടായിരുന്നെന്ന് പൊലീസ് പറഞ്ഞു.
മരുന്നുകളില്‍ ചിലതിന്റെ കാലാവധി തീര്‍ന്നിരുന്നെന്നും പരിശോധനയില്‍ കണ്ടെത്തി. ജൂണ്‍ ഏഴാം തിയതി ലഭിച്ച പരാതിയുടെ അടിസ്ഥാനത്തിലായിരുന്നു റെയിഡ്. സംഘം ഇതിനോടകം 400ഓളം വ്യാജ ഇഞ്ചക്ഷനുകള്‍ വിറ്റുട്ടുണ്ടെന്നും ഓരോ ഇഞ്ചക്ഷനും 250 രൂപ മുതല്‍ 12,000 രൂപവരെ വില ഈടാക്കിയാണ് വിറ്റിരുന്നതെന്നും അന്വേഷണ ഉദ്യോഗസ്ഥര്‍ പറഞ്ഞു.
