കേരളം
സംസ്ഥാനത്തെ ബാറുകള് അടുത്തയാഴ്ച തുറന്നേക്കും
സംസ്ഥാനത്തെ ബാറുകള് അടുത്തയാഴ്ച തുറന്നേക്കും. കോവിഡ് മാനദണ്ഡങ്ങള് പാലിക്കുന്നുണ്ടെന്ന് ഉറപ്പുവരുത്താന് എക്സൈസ്, പോലിസ്, റവന്യൂ വിഭാഗങ്ങള് ബാറുകളില് പരിശോധന നടത്തും.
അഞ്ചാം തീയതി തദ്ദേശ സ്വയംഭരണ തിരഞ്ഞെടുപ്പ് വിജ്ഞാപനം ഉണ്ടാകും മുന്പ് ബാറുകള് തുറക്കാമെന്ന ധാരണയുടെ അടിസ്ഥാനത്തിലാണ് തീരുമാനം.
കോവിഡ് മഹാമാരിയെ തുടര്ന്ന് ലോക്ഡൗണ് പ്രഖ്യാപിച്ച സമയത്ത് പൂട്ടിയ ബാറുകള് കോവിഡ് മാനദണ്ഡങ്ങള് പാലിച്ചു നവംബര് ആദ്യവാരം തുറക്കാമെന്നാണ് സര്ക്കാര് തലത്തിലെ ധാരണ.
തദ്ദേശ സ്വയംഭരണ തിരഞ്ഞെടുപ്പ് വിജ്ഞാപനം വന്നു കഴിഞ്ഞാല് ഡിസംബര് അവസാനം മാത്രമേ ബാറുകള് തുറക്കാന് കഴിയുകയുള്ളു. മൂന്നുമാസം കഴിഞ്ഞ് നിയമസഭാ തിരഞ്ഞെടുപ്പുണ്ടാകുമെന്നതിനാല് ഡിസംബര് അവസാനം ബാര് തുറക്കുന്നത് വിവാദത്തില് കലാശിക്കുകയും ചെയ്യും.
ഈ സാഹചര്യത്തില് ഈ മാസം അവസാനമോ അടുത്ത മാസം ആദ്യമോ തുറക്കുന്നതാണ് നല്ലതെന്ന് സര്ക്കാര് കരുതുന്നു. ബാര് തുറക്കുന്നത് മുന്നില് കണ്ട് കൗണ്ടര് വഴി വില്ക്കാനായി വിലകുറഞ്ഞ മദ്യങ്ങള് എടുക്കുന്നത് ബാറുകാര് കുറച്ചു.
അതേസമയം, കോവിഡ് നിയന്ത്രണങ്ങള് പാലിക്കുന്നുണ്ടോയെന്നുള്ള പരിശോധനകള് കര്ശനമാക്കാന് തീരുമാനിച്ചിട്ടുണ്ട്.
ഒരു മേശയ്ക്ക് ഇരുവശവും അകലം പാലിച്ച് രണ്ടുപേരെ മാത്രമേ ഇരിക്കാന് അനുവദിക്കൂ. ഭക്ഷണം പങ്കുവച്ച് കഴിക്കാന് അനുവദിക്കില്ല.
വെയ്റ്റര്മാര് മാസ്കും കയ്യുറയും ധരിക്കണം. ഇതര സംസ്ഥാനങ്ങളില് ബാറുകള് തുറന്നപ്പോള് തന്നെ സംസ്ഥാനത്തും തുറക്കണമെന്നാവശ്യപ്പെട്ട് ബാര് ഓണേഴ്സ് അസോസിയേഷന് സര്ക്കാരിനെ സമീപിച്ചിരുന്നു.