കേരളം
അട്ടപ്പാടി മധു വധക്കേസ്: ഒന്നാം പ്രതിയുള്പ്പടെ കുറ്റക്കാരനെന്ന് കണ്ടെത്തി കോടതി, ശിക്ഷാ വിധി നാളെ
അട്ടപ്പാടി മധു വധക്കേസില് ഒന്നാം പ്രതി ഹുസൈന്, രണ്ടാം പ്രതി മരക്കാര്, മൂന്നാം പ്രതി ഷംസുദ്ധീന്, അഞ്ചാം പ്രതി രാധാകൃഷ്ണന്, ആറാം പ്രതി അബൂബക്കര്, ഏഴാം പ്രതി സിദ്ദിഖ്, എട്ടാം പ്രതി ഉബൈദ്, ഒൻപതാം പ്രതി നജീബ്, പത്താം പ്രതി ജൈജുമോൻ, പന്ത്രണ്ടാം പ്രതി സജീവ്, പതിമൂന്നാം പ്രതി സതീഷ്, പതിനാലാം പ്രതി ഹരീഷ് തുടങ്ങിയവര് കുറ്റക്കാരാണെന്ന് കോടതി കണ്ടെത്തി. ഒന്നും രണ്ടും പ്രതികള്ക്കെതിരെയുള്ള 304(2) വകുപ്പ് തെളിഞ്ഞതായും കോടതി വ്യക്തമാക്കി. നാലാം പ്രതി അനീഷിനെയും പതിനൊന്നാം പ്രതി അബ്ദുല് കരീമിനെയും കോടതി മാറ്റിനിര്ത്തി. കേസില് ശിക്ഷാ വിധി കോടതി നാളെ പ്രഖ്യാപിക്കും. മണ്ണാര്ക്കാട് എസ് സി-എസ്ടി കോടതിയാണ് കേസില് വിധി പറഞ്ഞത്.
കേസില് ആകെ 16 പ്രതികളാണുള്ളത്. പ്രതികളെല്ലാവരും കോടതിയില് എത്തിയിരുന്നു. മാര്ച്ച് പത്തിനാണ് കേസിലെ അന്തിമവാദം പൂര്ത്തിയായത്. നീതി പ്രതീക്ഷിച്ചു കൊണ്ട് കഴിഞ്ഞ അഞ്ച് വര്ഷമായി ഒറ്റപ്പെടുത്തലുകളും ഭീഷണിയും മറികടന്ന് കുറ്റക്കാരെ നിയമത്തിന് മുന്നില് എത്തിക്കാന് മധുവിന്റെ കുടുംബം നടത്തിയ പോരാട്ടമാണ് കേസിനെ വിധി പ്രഖ്യാപനം വരെ എത്തിച്ചത്.
സാക്ഷിവിസ്താരവും അന്തിമ വാദവും പൂര്ത്തിയായ കേസ് വിധി പറയാന് രണ്ട് തവണ മാറ്റിവെച്ചിരുന്നു. ഏറെ നാടകീയ സംഭവങ്ങള്ക്കൊടുവിലാണ് അട്ടപ്പാടി മധു വധക്കേസ് വിധി പ്രഖ്യാപനത്തിലേക്ക് കടന്നത്. 2018 ഫെബ്രുവരി 22നാണ് അട്ടപ്പാടി ആനവായ് കടുകമണ്ണ ഊരിലെ ആദിവാസി യുവാവ് മധു കൊല്ലപ്പെടുന്നത്. മോഷണ കുറ്റമാരോപിച്ച് ഒരു സംഘമാളുകള് മധുവിനെ ക്രൂരമായി മര്ദ്ദിച്ച് കൊലപ്പെടുത്തിയെന്നാണ് കേസ്. പ്രോസിക്യൂട്ടര്മാര് മാറി മാറിയെത്തിയ കേസ് പതിനൊന്ന് മാസം നീണ്ട സാക്ഷി വിസ്താരത്തിന് ശേഷമാണ് വിധി പ്രഖ്യാപനത്തിലേക്ക് കടന്നത്. 3000ത്തിലധികം പേജുകളുളള കുറ്റപത്രത്തില് 127 സാക്ഷികളാണ് ഉണ്ടായിരുന്നത്. ഇതില് മധുവിന്റെ ബന്ധുക്കളുള്പ്പടെ 24 പേര് വിചാരണക്കിടെ കൂറുമാറിയിരുന്നു.
കൂറുമാറിയ വനം വകുപ്പിലെ താല്ക്കാലിക ജീവനക്കാരായ നാലുപേരെ ജോലിയില് നിന്നും പിരിച്ചുവിട്ടിരുന്നു. ഇതിനിടെ കൂറുമാറിയ സാക്ഷികള് കോടതിയിലെത്തി പ്രോസിക്യൂഷന് അനുകൂല മൊഴി നല്കി. കൂറുമാറിയ സാക്ഷിയുടെ കാഴ്ച പരിശോധിക്കുക എന്ന അപൂര്വ്വങ്ങളില് അപൂര്വ്വമായ സംഭവത്തിനും മണ്ണാര്ക്കാട്ടെ പ്രത്യേക കോടതി വിസ്താരത്തിനിടെ സാക്ഷിയായി. മാര്ച്ച് പത്തിന് കേസിന്റെ അന്തിമവാദം പൂര്ത്തിയായിരുന്നു. 18 ന് വിധി പറയും എന്നായിരുന്നു ആദ്യം കോടതി അറിയിച്ചിരുന്നത്. എന്നാല് സാങ്കേതിക തടസങ്ങളാല് കേസിലെ വിധി പ്രഖ്യാപനം ഇന്നത്തേക്ക് മാറ്റുകയായിരുന്നു.