കേരളം
കൊവിഡ് മരണനിരക്ക് കുറയ്ക്കാന് അണുബാധ നിയന്ത്രണം ശക്തമാക്കണം: ആരോഗ്യവകുപ്പ്
സംസ്ഥാനത്ത് കൊവിഡ് മരണനിരക്ക് കുറയ്ക്കാന് അണുബാധ നിയന്ത്രണം ശക്തമാക്കണമെന്ന് ആരോഗ്യവകുപ്പ്. ഡയാലിസിസ്, അര്ബുദ ചികിത്സാ കേന്ദ്രങ്ങളില് അണുബാധ നിയന്ത്രണം ശക്തിപ്പെടുത്താന് ആരോഗ്യവകുപ്പ് നിര്ദേശം നല്കി. അര്ബുദം, വൃക്കരോഗം, പ്രമേഹം, ഉയര്ന്ന രക്തസമ്മര്ദം എന്നീ രോഗങ്ങള് ഉള്ളവരില് കൊവിഡ് ബാധിച്ചുള്ള മരണനിരക്ക് കൂടുതലാണെന്ന് കണ്ടെത്തലിനെ തുടര്ന്നാണിത്.
ഓഗസ്റ്റ് മാസത്തിലെ കൊവിഡ് മരണ അവലോകന റിപ്പോര്ട്ടിന്റെ അടിസ്ഥാനത്തിലാണ് അണുബാധ നിയന്ത്രണം ശക്തമാക്കുന്നത്. ഓഗസ്റ്റ് മാസത്തിലെ 252 മരണങ്ങളില് 223 ഉം കൊവിഡ് ബാധിച്ചാണ്. മരിച്ചവരില് ഭൂരിഭാഗവും കൊവിഡിനൊപ്പം മറ്റ് അസുഖങ്ങള് കൂടി ഉണ്ടായിരുന്നവരാണ്. മരിച്ചവരില് 120 പേര് കടുത്ത പ്രമേഹം ഉള്ളവരായിരുന്നു.
ഉയര്ന്ന രക്തസമ്മര്ദം ഉണ്ടായിരുന്ന 116 പേര്ക്കും മരണം സംഭവിച്ചു. ഹൃദയ സംബന്ധമായ പ്രശ്നങ്ങളുണ്ടായിരുന്ന 54 പേരും, വൃക്കരോഗികളായ 36 പേരും മരിച്ചു. ഓഗസ്റ്റില് മരിച്ച 15 പേര് അര്ബുദ രോഗികളായിരുന്നു. ഇത്തരക്കാര് ചികിത്സക്കെത്തുന്ന ഇടങ്ങള് അണുബാധ മുക്തമാകണമെന്നാണ് നിര്ദേശം.
റിവേഴ്സ് ക്വാറന്റൈനിലുണ്ടായ വീഴ്ചയില് 61 മരണങ്ങളാണുണ്ടായത്. മരിച്ചശേഷം 13 പേരില് കൊവിഡ് കണ്ടെത്തി. അതുകൊണ്ട് തന്നെ മരിച്ചനിലയില് ആശുപത്രിയിലെത്തിച്ചാല് കൊവിഡ് പരിശോധന കര്ശനമായി നടത്തണമെന്നും ഓഡിറ്റ് റിപ്പോര്ട്ട് പറയുന്നു. ഓഗസ്റ്റ് മാസത്തിലെ മരണങ്ങളില് കൂടുതല് പുരുഷന്മാരാണ്.
157 പുരുഷന്മാരും 66 സ്ത്രീകളുമാണ് കൊവിഡ് ബാധിച്ച് മരിച്ചത്. ഏറ്റവും കൂടുതല്പേര് മരിച്ചത് കൊല്ലം ജില്ലയിലാണ്. 34 പേരാണ് കൊല്ലത്ത് മരിച്ചത്. തൊട്ടുപിന്നില് തിരുവനന്തപുരം- 31 പേര്. ആലപ്പുഴ, എറണാകുളം, തൃശൂര്, കോഴിക്കോട്, കണ്ണൂര് എന്നീ ജില്ലകളിലും മരണസംഖ്യ 20 ന് മുകളിലാണ്.