കേരളം
ജോലിയേക്കുറിച്ചുള്ള വിവാദങ്ങള്‍ക്ക് പിന്നിലും എം ശിവശങ്കറെന്ന് സ്വപ്ന സുരേഷ്
സ്വർണ്ണ കടത്ത് കേസ് പ്രതിയായ സ്വപ്ന സുരേഷിന് പുതിയ നിയമനം ലഭിച്ചതിന് പിന്നാലെ നിരവധി വിവാദങ്ങളും തല പൊക്കിയിരുന്നു. പുതിയ ജോലിയേക്കുറിച്ചുള്ള വിവാദങ്ങള്‍ക്ക് പിന്നിലും എം ശിവശങ്കർ ആണെന്ന് ആരോപിക്കുകയാണ് സ്വപ്ന സുരേഷ്. താന്‍ ഉപദ്രവിക്കുമെന്ന പേടിയാണ് വിമര്‍ശകര്‍ക്കെന്നും ജീവിക്കാന്‍ അനുവദിക്കണമെന്ന് സ്വപ്ന പറഞ്ഞു.
ഇപ്പോഴത്തെ ആക്രമണത്തിന് പിന്നിലും എന്തൊക്കെയോ ഉദ്ദേശമുണ്ട്. അതുകൊണ്ട് ശിവശങ്കർ സാറിനോട് പറയാനുള്ളത് , നിങ്ങൾക്ക് എന്നെ കൊല്ലാൻ എല്ലാ അവകാശവുമുണ്ട്. ദയവുചെയ്ത് എന്നെ കൊല്ലു, ഒരു ആണായിട്ട് വന്ന് എനിക്കും എന്റെ മക്കൾക്കും അമ്മയ്ക്കും കുറച്ച് വിഷം വാങ്ങി താ. അതല്ലാതെ ഇത്തരം വൃത്തികെട്ട കളി കളിക്കരുത്, സ്വപ്ന പറഞ്ഞു.
എച്ച്ആര്‍ഡിഎസിന് എന്തെങ്കിലും രാഷ്ട്രീയ ബന്ധമുള്ളതായി തനിക്കറിയില്ലെന്നും സ്വപ്ന പറഞ്ഞു. ഓഫറിൽ ഒരിടത്തും എന്റെ അറിവിൽ ആർഎസ്എസ് എൻജിഒ ആണെന്നോ ബിജെപി എൻജിഒ ആണെന്നോ വേറെ ഏതെങ്കിലുമൊരു രാഷ്ട്രീയ പാർട്ടിയുടെ എൻജിഒ ആണെന്നോ ഇല്ല. ജീവിക്കാൻ നിവർത്തിയില്ലാതെ നിൽക്കുന്ന എനിക്ക് ഫിൽറ്റർ ചെയ്തെടുക്കാൻ മുന്നിൽ ഒരുപാട് അവസരങ്ങളൊന്നുമില്ല, സ്വപ്ന കൂട്ടിച്ചേർത്തു.
