കേരളം
കേന്ദ്ര സര്‍വീസില്‍ മള്‍ട്ടി ടാസ്‌കിങ് ഒഴിവുകളിലേക്ക് അപേക്ഷിക്കാം
കേന്ദ്ര സര്‍വീസില്‍ മള്‍ട്ടി ടാസ്‌കിങ് സ്‌റ്റാഫ് (നോണ്‍-ടെക്‌നിക്കല്‍) ഒഴിവുകളിലേക്കു സ്‌റ്റാഫ് സിലക്‌ഷന്‍ കമ്മിഷന്‍ (എസ്‌എസ്‍സി) അപേക്ഷകള്‍ ക്ഷണിച്ചു. കേരളത്തിലെ ലാസ്റ്റ് ഗ്രേഡിനു തുല്യമായ ജോലിയാണ്. ഓഫിസ് ശുചീകരണം മുതല്‍ ഫയല്‍ കൈമാറ്റംവരെ അടക്കമുള്ള ജോലികള്‍ ഉള്‍പ്പെടും. ഗ്രൂപ്പ് സി തസ്‌തികയാണ്. കേന്ദ്ര സര്‍ക്കാരിലെ വിവിധ മന്ത്രാലയങ്ങളിലും വകുപ്പുകളിലും ഓഫിസുകളിലുമാകും നിയമനം. മാര്‍ച്ച്‌ 21 വരെ ഓണ്‍ലൈനായി അപേക്ഷിക്കാം.
എസ്‌എസ്‌എല്‍സി ജയം (മെട്രിക്കുലേഷന്‍)/തത്തുല്യമാണ് യോഗ്യത.
.
പ്രായം: രണ്ടു ഗ്രൂപ്പുകളിലായി പ്രായം തിരിച്ചിട്ടുണ്ട്. 18-25. (1996 ജനുവരി രണ്ടിനു മുന്‍പോ 2003 ജനുവരി ഒന്നിനു ശേഷമോ ജനിച്ചവരായിരിക്കരുത്), 18-27. (1994 ജനുവരി രണ്ടിനു മുന്‍പോ 2003 ജനുവരി ഒന്നിനു ശേഷമോ ജനിച്ചവരായിരിക്കരുത്). 2021 ജനുവരി 1 അടിസ്‌ഥാനമാക്കി പ്രായം കണക്കാക്കും. എസ്‌സി/എസ്ടിക്കാര്‍ക്ക് അഞ്ചും ഒബിസിക്കു മൂന്നും ഭിന്നശേഷിക്കാര്‍ക്കു പത്തും വര്‍ഷം ഇളവുണ്ട്. വയസ്സിളവു സംബന്ധിച്ച കൂടുതല്‍ വിവരങ്ങള്‍ വെബ്‌സൈറ്റില്‍.
പൊതു എഴുത്തുപരീക്ഷ വഴി. രണ്ടു ഘട്ടമായാണ് എഴുത്തുപരീക്ഷ. പേപ്പര്‍-1 ഒബ്‌ജെക്‌ടീവ് മാതൃകയില്‍ കംപ്യൂട്ടര്‍ അധിഷ്ഠിത പരീക്ഷ. രാജ്യത്തെ വിവിധ കേന്ദ്രങ്ങളില്‍ 2021 ജൂലൈ 1 മുതല്‍ 20 വരെ. നെഗറ്റീവ് മാര്‍ക്കുണ്ട്. ഷോര്‍ട് ലിസ്‌റ്റ് ചെയ്യപ്പെടുന്നവര്‍ക്കായി നവംബര്‍ 21 നു ഡിസ്‌ക്രിപ്‌റ്റീവ് (പേപ്പര്‍-2) പരീക്ഷ നടത്തും. സിലബസ് വിശദാംശങ്ങള്‍ക്കു വിജ്‌ഞാപനം കാണുക.
കേരളത്തില്‍ തിരുവനന്തപുരം, കൊല്ലം, കോട്ടയം, എറണാകുളം, തൃശൂര്‍, കോഴിക്കോട്, കണ്ണൂര്‍ എന്നിവിടങ്ങളില്‍ പരീക്ഷാകേന്ദ്രമുണ്ട്. ഒരേ റീജനു കീഴില്‍ മുന്‍ഗണനാക്രമത്തില്‍ 3 കേന്ദ്രങ്ങള്‍ തിരഞ്ഞെടുക്കാം.
ഫീസ്: 100 രൂപ. പട്ടികവിഭാഗം, ഭിന്നശേഷിക്കാര്‍, വിമുക്‌തഭടന്മാര്‍, വനിതകള്‍ എന്നിവര്‍ക്കു ഫീസില്ല. ഓണ്‍ലൈനായും സ്‌റ്റേറ്റ് ബാങ്ക് ഓഫ് ഇന്ത്യ വഴി ചെലാനായും ഫീസ് അടയ്ക്കാം. ഓണ്‍ലൈനില്‍ മാര്‍ച്ച്‌ 23 വരെ വരെ അടയ്ക്കാം. ചെലാനായി അടയ്ക്കുന്നവര്‍ മാര്‍ച്ച്‌ 25 നു മുന്‍പു ചെലാന്‍ ജനറേറ്റ് ചെയ്യണം.
അപേക്ഷിക്കേണ്ട വിധം: www.ssc.nic.in എന്ന വെബ്‌സൈറ്റ് വഴി അപേക്ഷ സമര്‍പ്പിക്കാം. ഒറ്റത്തവണ റജിസ്ട്രേഷന്‍ പൂര്‍ത്തിയാക്കിയവര്‍ റജിസ്ട്രേഷന്‍ നമ്ബറും പാസ്‌വേഡും ഉപയോഗിച്ച്‌ ലോഗിന്‍ ചെയ്ത് അപേക്ഷിക്കുക. അല്ലാത്തവര്‍ ഒറ്റത്തവണ റജിസ്ട്രേഷന്‍ പൂര്‍ത്തിയാക്കിയ ശേഷം അപേക്ഷിക്കുക.
