സിനിമ – സീരിയൽ താരം അപർണ നായർ തൂങ്ങിമരിച്ച നിലയിൽ

സിനിമ – സീരിയൽ താരം അപർണ നായരെ തൂങ്ങിമരിച്ച നിലയിൽ കണ്ടെത്തി. കരമന തളിയലെ വീട്ടിലാണ് നടിയെ മരിച്ച നിലയിൽ കണ്ടെത്തിയത്. മൃതദേഹം പിആർഎസ് ആശുപത്രിയിലേക്ക് മാറ്റി. അസ്വാഭാവിക മരണത്തിന് പൊലീസ് കേസെടുത്തു.

കഴിഞ്ഞ ദിവസം വൈകുന്നേരമാണ് തിരുവനന്തപുരത്തെ വീട്ടിൽ അപർണയെ തൂങ്ങിയ നിലയിൽ കണ്ടെത്തിയത്. ആശുപത്രിയിൽ എത്തിച്ചപ്പോഴേക്കും മരണം സംഭവിച്ചിരുന്നു. സംഭവ സമയത്ത് വീട്ടിൽ അമ്മയും സഹോദരിയും ഉണ്ടായിരുന്നു എന്നാണ് വിവരം. മരണത്തിൽ കരമന പൊലീസ് അന്വേഷണം ആരംഭിച്ചു.

അതേസമയം ടി.വി. സീരിയൽ നടി അപർണ നായരുടെ (Aparna Nair) മരണത്തിൽ നടുക്കം മാറാതെ അവരുടെ ആരാധകർ. മരണത്തിനു തൊട്ടു മുൻപ് പോലും അപർണയുടെ പേജിൽ സന്തോഷത്തിന്റെ ചിത്രങ്ങൾ മാത്രം.

തീർത്തും സജീവമല്ലാത്ത ഫേസ്ബുക്ക് പേജും, വളരെയേറെ സജീവമായ ഇൻസ്റ്റഗ്രാം പേജുമാണ് അപർണ നായരുടെ പേരിലുള്ളത്. ഇൻസ്റ്റഗ്രാമിൽ നോക്കിയാൽ ഒരു അഭിനേത്രി എന്ന നിലയിലല്ല, ഒരു ഭാര്യയും അമ്മയും എന്ന നിലയിൽ മാത്രമേ അപർണയെ കാണാൻ സാധിക്കൂ. ഭർത്താവും രണ്ട് പെൺകുഞ്ഞുങ്ങളും അടങ്ങുന്നതാണ് അപർണയുടെ കുടുംബം. പോസ്റ്റുകളിൽ എല്ലാം കുടുംബത്തോടൊപ്പം സന്തോഷത്തോടെ കഴിയുന്ന വ്യക്തി എന്ന് മാത്രമേ തോന്നാൻ ഇടയുള്ളൂ. ഇളയ കുഞ്ഞിന് പ്രായം തീരെ കുറവാണ്.

‘എന്റെ ഉണ്ണി കളി പെണ്ണ്’ എന്ന് ക്യാപ്‌ഷൻ നൽകിയ ഇളയമകളുടെ മുഖമുള്ള പോസ്റ്റാണ് അപർണ അവസാനമായി ഇട്ടിട്ടുള്ളത്. അതിനു തൊട്ടു മുൻപായി കാണുന്നത് പ്രസന്നവദനയായി, സാരി ചുറ്റി നിൽക്കുന്ന അപർണയുടെ കുറച്ചേറെ ചിത്രങ്ങളുള്ള ഒരു റീൽസ് വീഡിയോയും. ഈ കുഞ്ഞുങ്ങളെ തനിച്ചാക്കി പോകാൻ അവരുടെ അമ്മയ്ക്ക് എങ്ങനെ സാധിച്ചു എന്നാണ് പലരും ക്യാപ്‌ഷനിൽ ചോദിക്കുന്നത്. മറ്റുള്ളവർക്ക് ആദരാഞ്ജലികൾ അർപ്പിക്കാൻ അല്ലാതെ മറ്റൊന്നിനും സാധിക്കുന്നില്ല. സീരിയൽ നടി എങ്കിലും, ചില ചിത്രങ്ങളിലും അപർണ മുഖം കാണിച്ചിട്ടുണ്ട്.

മേഘതീർഥം, മുദ്ദുഗൗ, അച്ചായൻസ്, കോടതി സമക്ഷം ബാലൻ വക്കീൽ, കൽക്കി തുടങ്ങിയ സിനിമകളിലും ചന്ദനമഴ, ആത്മസഖി, മൈഥിലി വീണ്ടും വരുന്നു, ദേവസ്പർശം, തുടങ്ങിയ സീരിയലുകളിലും അഭിനയിച്ചിട്ടുണ്ട്. ഭർത്താവ്: സഞ്ജിത്, മക്കൾ: ത്രയ, കൃതിക.