കേരളം
എന്ഫോഴ്സ്മെന്റ് സംഘം പരിശോധനയ്ക്കായി ബിനീഷ് കോടിയേരിയുടെ വീട്ടില്‍
സാമ്പത്തിക ഇടപാടുകള്‍ അന്വേഷിക്കുന്നതിനായി ബംഗളൂരുവില്‍ നിന്നുള്ള എന്ഫോഴ്സ്മെന്റ് സംഘം തിരുവനന്തപുരത്തെ വീട്ടില്‍ പരിശോധനയ്‌ക്കെത്തി.
കര്‍ണാടക പോലിസ് സി.ആര്‍.പി.എഫും ഇ.ഡി സംഘത്തിനൊപ്പമുണ്ട്. എട്ടംഗ സംഘമാണ് പരിശോധനയ്ക്കായി എത്തിയത്. ഒന്‍പത് മണിയോടെയാണ് ഉദ്യോഗസ്ഥര്‍ ഇവിടെയെത്തിയത്. എന്ഫോഴ്സ്മെന്റ് ഡയറക്ടറേറ്റിന് പുറമെ ബിനീഷ് കോടിയേരിയുടെ സാമ്പത്തിക ഇടപാടുകളെപ്പറ്റി ആദായനികുതി വകുപ്പും അന്വേഷിക്കുന്നുണ്ട്.
കേസ് രജിസ്റ്റര്‍ ചെയ്‌തേക്കുമെന്നാണ് ലഭിക്കുന്ന വിവരങ്ങള്‍. ഇ.ഡി കണ്ടെത്തിയ ആദായ നികുതി റിട്ടേണും ബാങ്ക് നിക്ഷേപവും തമ്മിലുള്ള വ്യത്യാസമാണ് ആദായ നികുതി വകുപ്പിന്റെ നടപടിക്ക് അടിസ്ഥാനം. ബിനീഷ് അറസ്റ്റിലാവുന്നതിന് തൊട്ടുമുമ്പ് വരെ മരുതുംകുഴിയിലുള്ള ‘കോടിയേരി’ എന്ന ഈ വീട്ടിലായിരുന്നു സി.പി.എം സംസ്ഥാന സെക്രട്ടറി കോടിയേരിയും ഭാര്യയും താമസിച്ചിരുന്നത്. അറസ്റ്റുണ്ടാകുമെന്ന അഭ്യൂഹങ്ങള്‍ക്ക് പിന്നാലെയാണ് കോടിയേരി എ.കെ.ജി സെന്ററിന് മുന്നിലുള്ള പാര്‍ട്ടി അനുവദിച്ച ഫ്‌ലാറ്റിലേക്ക് താമസം മാറിയത്.
Read also: ബിനീഷ് കോടിയേരിയുടെ വീട്ടില്‍ എന്ഫോഴ്സ്മെന്റ് പരിശോധന നടത്തും
തിരുവനന്തപുരത്ത് ബിനീഷ് ബന്ധപ്പെട്ടിട്ടുള്ള ബിസിനസ് സംരംഭങ്ങള്‍ പലതാണെന്നാണ് അന്വേഷണ ഏജന്‍സികള്‍ക്ക് കിട്ടിയിട്ടുള്ള വിവരം. അബ്ദുള്‍ ലത്തീഫ് ബിനീഷ് കോടിയേരിയുടെ ബിനാമിയാണെന്നാണ് അന്വേഷണ ഉദ്യോഗസ്ഥര്‍ ഇപ്പോള്‍ പറയുന്നത്. അതേസമയം, കസ്റ്റഡിയിലുള്ള ബിനീഷിനെ തുടര്‍ച്ചയായി ആറാം ദിവസമാണ് ഇ.ഡി ചോദ്യം ചെയ്യുന്നത്. കേരളത്തിലെ ബിനീഷിന്റെ കമ്പനികളുമായി ബന്ധപ്പെട്ടും ഇ.ഡി അന്വേഷണം പുരോഗമിക്കുകയുമാണ്.
