മാസ്കും സാമൂഹിക അകലവും തുടരണം; നിർദേശങ്ങളുമായി കേന്ദ്രം

കോവിഡ് പ്രതിരോധത്തിന്റെ ഭാഗമായി രാജ്യത്ത് ദുരന്ത നിവാരണ നിയമ പ്രകാരം തുടരുന്ന എല്ലാ നടപടികളും നിർത്തിവക്കണമെന്ന് കേന്ദ്ര ആഭ്യന്തര മന്ത്രാലയം. മാസ്കും സാമൂഹികഅകലവും തുടരണം. കേസെടുക്കുന്നത് ഒഴിവാകുമെങ്കിലും ഇക്കാര്യത്തിൽ അന്തിമ തീരുമാനമെടുക്കാനുള്ള അവകാശം സംസ്ഥാനങ്ങൾക്കുണ്ട്. ഈ മാസം 31 മുതലാണ് ഉത്തരവ് പ്രാബല്യത്തിൽ വരിക. മാസ്ക് ഒഴിവാക്കാൻ സമയമായിട്ടില്ലെന്ന് ഐ.എം.എ പ്രതികരിച്ചു.

രാജ്യത്ത് പ്രതിദിന കോവിഡ് രോഗികളുടെ എണ്ണം 2000 ന് താഴെ എത്തിയ സാഹചര്യത്തിലാണ് നിയന്ത്രണങ്ങളിൽ ഇളവ് നൽകാൻ കേന്ദ്ര സർക്കാർ തീരുമാനിച്ചത്. ഈ മാസം 31 മുതൽ ദുരന്ത നിവാരണ നിയമപ്രകാരമുള്ള നടപടികൾ പാടില്ലെന്നാണ് ആഭ്യന്തര മന്ത്രാലയത്തിന്റെ ഉത്തരവ്. മാസ്ക്, സാമൂഹിക അകലം തുടങ്ങി ആരോഗ്യമന്ത്രാലയം നൽകിയ നിർദേശങ്ങൾ തുടരണമെന്നും ആഭ്യന്തര മന്ത്രാലയത്തിന്റെ ഉത്തരവിൽ പറയുന്നു. ദുരന്ത നിവാരണ നിയമം പിൻവലിക്കുന്നതോടെ മാസ്‌ക്, സാമൂഹിക അകലം, കോവിഡ് നിയന്ത്രണം തുടങ്ങിയവയുടെ ലംഘനത്തിന് കേസെടുക്കുന്നത് ഒഴിവാകും.

എന്നാൽ രോഗത്തിന്റെയും പ്രദേശത്തിന്റെയും സ്വഭാവം കണക്കിലെടുത്ത്, ഇക്കാര്യ ങ്ങളിൽ അന്തിമ തീരുമാനമെടുക്കാനുള്ള അവകാശം സംസ്ഥാനങ്ങൾക്കുണ്ട്. അതേസമയം കോവിഡ് വ്യാപനം തുടരുകയാണെന്നും മാസ്ക് ഒഴിവാക്കാൻ സമയമായിട്ടില്ലെന്നും ഐ.എം.എ പ്രതികരിച്ചു. പൊതു ഇടങ്ങളിൽ മാസ്ക് ധരിക്കുന്നത് തുടരേണ്ടതുണ്ടെന്നും ഐ.എം.എ കൂട്ടിച്ചേർത്തു.