കേരളം
തലയ്‌ക്ക്‌ അടിയേറ്റ്‌ ഓട്ടോ ഡ്രൈവര്‍ മരിച്ചു; സുഹൃത്ത്‌ അറസ്‌റ്റില്‍
മദ്യപിക്കുന്നതിനിടെയുണ്ടായ തര്‍ക്കത്തെത്തുടര്‍ന്ന്‌ തലയ്‌ക്ക്‌ അടിയേറ്റ്‌ ഓട്ടോ ഡ്രൈവര്‍ മരിച്ചു. സുഹൃത്ത്‌ അറസ്‌റ്റില്‍. കരമന റ്റി സി 47/1543 നെടിയന്‍മുടുമ്പില്‍ വീട്ടില്‍ ശശിയുടെ മകന്‍ ശ്യാമാ (36) ണ്‌ മരിച്ചത്‌. സുഹൃത്ത്‌ വിളപ്പില്‍ശാല കാവിന്‍ പുറം ഒ എല്‍ എക്‌സ് കോളനി ഹൗസ്‌ നമ്പര്‍ 2-ല്‍ സതികുമാറി(45)നെ പോലീസ്‌ അറസ്‌റ്റ്‌ ചെയ്തു. ശനിയാഴ്‌ച രാത്രി ഒമ്പതരയോടെ ലോഡ്‌ജിലിരുന്ന മദ്യപിക്കുന്നതിനിടെയുണ്ടായ തര്‍ക്കത്തിനൊടുവില്‍ കമ്പിപ്പാരകൊണ്ട്‌ തലയ്‌ക്കടിക്കുകയായിരുന്നെന്നു പോലീസ്‌ പറഞ്ഞു.
വിവരമറിഞ്ഞെത്തിയ ലോഡ്‌ജ്‌ ഉടമയും പോലീസും ചേര്‍ന്നു ശ്യാമിനെ കോളേജാശുപത്രിയില്‍ എത്തിച്ചെങ്കിലും പുലര്‍ച്ചെ മുന്നു മണിയോടെ മരിച്ചു. സ്‌ഥലത്തുനിന്നു കടന്ന പ്രതിയെ വിഴിഞ്ഞം ഹാര്‍ബറിനു സമീപത്തുവച്ചാണ്‌ അറസ്‌റ്റ്‌ ചെയ്തത്. ശ്യാമിന്റെ മൃതദേഹം മെഡിക്കല്‍ കോളേജാശുപത്രിയില്‍ സൂക്ഷിക്കുന്നു. കോവിഡ്‌ പരിശോധയ്‌ക്ക്‌ ശേഷം മാത്രമേ പോലീസിന്‌ ഇന്‍ക്വസ്‌റ്റ്‌ തയ്യാറാക്കുന്നതിന്‌ സാധിക്കുകയുള്ളൂ. ശ്യാം അവിവാഹിതനാണ്‌.
