ദേശീയം
സൂയസ് കനാലില്‍ കപ്പല്‍ കുരുക്ക് മൂന്നാം ദിവസം; കാത്തുനിൽക്കുന്നത് 150ലേറെ കപ്പലുകള്‍
സൂയസ് കനാലില്‍ മണ്ണിലമര്‍ന്ന കൂറ്റന്‍ ചരക്കു കപ്പലിനെ രക്ഷപ്പെടുത്താന്‍ രണ്ടു ദിവസമായി തുടരുന്ന ശ്രമങ്ങള്‍ക്കും സാധിക്കാതെ വന്നതോടെ വെട്ടിലായി ലോക രാജ്യങ്ങള്‍. വടക്ക് മെഡിറ്ററേറനിയനെയും തെക്ക് ചെങ്കടലിനെയും ബന്ധിപ്പിച്ച്‌ ഒന്നര നൂറ്റാണ്ട് മുമ്പ് നിര്‍മിച്ച 193 കിലോമീറ്റര്‍ കനാലില്‍ 400 മീറ്റര്‍ നീളമുള്ള കപ്പലാണ് കഴിഞ്ഞ ദിവസം വിലങ്ങനെ നിലംതൊട്ടുനിന്നത്. ചില സ്ഥലങ്ങളില്‍ 205 മീറ്ററാണ് കനാലിന്‍റെ വീതി.
ടഗ് ബോട്ടുകള്‍ ഉപയോഗിച്ച്‌ ചരക്കുകപ്പല്‍ വലിച്ച്‌ നേരെയാക്കാന്‍ ശ്രമം തുടരുന്നുണ്ടെങ്കിലും രക്ഷാ പ്രവര്‍ത്തനം വിജയിച്ചിട്ടില്ല. ആദ്യം ഇരു കരകളിലും ഡ്രെഡ്ജിങ് നടത്തിയ ശേഷമാകും കപ്പല്‍ വലിച്ചുനേരെയാക്കുക. സ്മിറ്റ് സാല്‍വേജ് എന്ന ഡച്ച്‌ കമ്പനിക്ക് ചുമതല നല്‍കിയിട്ടുണ്ട്
രണ്ടു ലക്ഷം െമട്രിക് ടണ്ണാണ് കപ്പല്‍ ഭാര്യം. ‘എവര്‍ഗ്രീനി’ന്‍റെ വലിപ്പവും കയറ്റിയ ഭാരവുമാണ് പ്രധാന വില്ലന്‍. രക്ഷാ ദൗത്യം അപകട സാധ്യത കണക്കിലെടുത്ത് ബുധനാഴ്ച രാത്രി നിര്‍ത്തിവെച്ചിരുന്നു. ഇരുവശത്തും നീങ്ങുകയായിരുന്ന 100 ലേറെ കപ്പലുകള്‍ ഗതാഗതം വഴിമുട്ടി പാതിവഴിയില്‍ നിര്‍ത്തിയിട്ട നിലയിലാണ്. എണ്ണ മുതല്‍ അവശ്യ വസ്തുക്കള്‍ വരെ കയറ്റിയ കപ്പലുകളാണ് ഇരുവശത്തും യാത്ര മുടങ്ങി കിടക്കുന്നത്. ഞായറാഴ്ചയോ തിങ്കളാഴ്ചയോ മാത്രമേ കപ്പല്‍ ശരിയായ ദിശയിലേക്ക് കൊണ്ടുവരാനാകൂ എന്നാണ് പ്രാഥമിക കണക്കുകൂട്ടല്‍. അതുകഴിഞ്ഞ് സാങ്കേതിക പരിശോധന കൂടി പൂര്‍ത്തിയായ ശേഷമാകും ഗതാഗതത്തിന് തുറന്നുകൊടുക്കുക.
ഈജിപ്തിന്‍റെ ഏറ്റവും വലിയ സാമ്ബത്തിക സ്രോതസ്സാണ് സൂയസ് കനാല്‍. ശരാശരി 560 കോടി ഡോളറാണ് അതുവഴി വരുമാനം. പ്രതിദിനം 960 കോടി ഡോളറിന്‍റെ ചരക്ക് സൂയസ് കനാല്‍ കടന്നുപോകുന്നുവെന്നാണ് കണക്ക്. അത് നിലക്കുന്നതോടെ കോടികളുടെ നഷ്ടമാണ് കമ്ബനികള്‍ക്കും അതുവഴി മറ്റുള്ളവര്‍ക്കും വരിക. മണിക്കൂറില്‍ 3000 കോടി രൂപയുടെ നഷ്ടമാകും ഇങ്ങനെയുണ്ടാവുകയെന്നാണ് കണക്കുകൂട്ടല്‍.
