കാരാപ്പുഴ അണക്കെട്ടിൽ കുട്ടവഞ്ചി മറിഞ്ഞ് ഒരാൾ മരിച്ചു

വയനാട് കാരാപ്പുഴ അണക്കെട്ടിൽ കുട്ട വഞ്ചി മറിഞ്ഞ് ഒരാൾ മരിച്ചു. നെല്ലാറച്ചാൽ നടുവീട്ടിൽ കോളനിയിലെ ഗിരീഷ് ആണ് മരിച്ചത്. ഞാമലംകുന്ന് വ്യൂപോയിന്റിന് സമീപം ആണ് അപകടം നടന്നത്. ഉച്ചയ്ക്ക് ഒന്നരയോടെ പശുവിന് പുല്ലു വെട്ടി കുട്ടത്തോണിയിൽ മടങ്ങുമ്പോഴായിരുന്നു അപകടം. 4 പേരാണ് തോണിയിലുണ്ടായിരുന്നത്. മറ്റു മൂന്നു പേർ നീന്തി രക്ഷപ്പെട്ടു.

അക്കരെ കടക്കുന്നതിനിടെ കുട്ടവഞ്ചി മറിയുകയായിരുന്നു. അപകടമുണ്ടാകാനുള്ള കാരണം വ്യക്തമല്ല. പ്രദേശവാസികള്‍ രക്ഷാപ്രവര്‍ത്തനം നടത്തിയെങ്കിലും ഗിരീഷിന്റെ ജീവന്‍ രക്ഷിക്കാനായില്ല.

കാരാപ്പുഴ അണക്കെട്ടിനു സമീപമുള്ള ആദിവാസി കോളനികളിലുള്ളവര്‍ യാത്രയ്ക്ക് കുട്ടവഞ്ചി ആശ്രയിക്കാറുണ്ട്. ഇത് പതിവാണെങ്കിലും ഇത്തരമൊരു അപകടം ആദ്യമായാണെന്നാണ് പ്രദേശവാസികള്‍ പറയുന്നത്‌.