ബസ് സ്റ്റോപ്പിൽനിന്ന് കാർ മാറ്റാൻ ആവശ്യപ്പെട്ടു; KSRTC ഡ്രൈവർക്ക് മർദനവും അസഭ്യവർഷവും

തൃപ്പൂണിത്തുറയിൽ കെ.എസ്. ആർ.ടി.സി ഡ്രൈവർക്ക് മർദനം. കണ്ണൻകുളങ്ങര ബൈപ്പാസിന് സമീപം കാർ കുറുകേയിട്ട് കെ.എസ്. ആർ.ടി.സി ബസ് ഡ്രൈവറെ മർദ്ദിക്കുകയായിരുന്നു. എറണാകുളം ബസ് ഡിപ്പോയിലെ പി.ഐ സുബൈറിനാണ് മർദനമേറ്റത്.

എറണാകുളം ഡിപ്പോയിൽ നിന്നും കട്ടപ്പനയിലേക്ക് പോകുകയായിരുന്ന ബസിലെ ഡ്രൈവറാണ് സുബൈർ. ബസ് സ്റ്റോപ്പിന് സമീപത്തായി നിർത്തിയിരുന്ന ഇന്നോവ കാർ മാറ്റാനായി ആവശ്യപ്പെട്ടതാണ് പ്രകോപനത്തിന് കാരണമെന്നാണ് വിവരം. സ്റ്റോപ്പിൽ നിന്നും ആളെ കയറ്റി ബസ് യാത്ര തുടർന്നതോടെ ഈ കാർ ബസിന് മുന്നിലായി നിർത്തിയിടുകയും ബസിന്റെ ഡോർ തുറന്ന് വന്ന് അസഭ്യ വർഷം നടത്തുകയും ശേഷം മർ​ദിക്കുകയുമായിരുന്നു.

ഡ്രൈവർക്ക് കൈക്കും തലക്കും പരിക്കേറ്റിട്ടുണ്ട്. നിലവിൽ തൃപ്പൂണിത്തുറ ആശുപത്രിയിൽ ചികിത്സ തേടിയിരിക്കുകയാണ് സുബൈർ. സുബൈറിന്റെ പരാതിയിൽ തൃപ്പൂണിത്തുറ ഹിൽപാലസ് പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.