കേരളം
കൈക്കൂലിയിൽ പിടിയിലായ KSRTC ഡെപ്യൂട്ടി ജനറൽ മാനേജർക്ക് സസ്പെൻഷൻ
കൈക്കൂലി വാങ്ങുന്നതിനിടയിൽ പിടിയിലായ കെഎസ്ആർടിസി ഡെപ്യൂട്ടി ജനറൽ മാനേജരെ സസ്പെൻഡ് ചെയ്തു.കോമേഴ്സൽ വിഭാഗം ഡെപ്യൂട്ടി മാനേജരായ സി ഉദയകുമാറിനെയാണ് സസ്പെൻഡ് ചെയ്യാൻ ഗതാഗത മന്ത്രി ആന്റണി രാജു ഉത്തരവിട്ടത്.
കഴിഞ്ഞ ദിവസമാണ് 30,000 രൂപ കൈക്കൂലി വാങ്ങുന്നതിനിടയിൽ ഉദയകുമാറിനെ വിജിലൻസ് പിടികൂടിയത്. തിരുവനന്തപുരത്തെ ക്ലബ്ബിൽ വെച്ചായിരുന്നു പണം കൈപ്പറ്റിയത്. പരസ്യത്തിന്റെ ബില്ലുകള് മാറാന് വേണ്ടി ഇടനിലക്കാരനോട് കൈക്കൂലി ആവശ്യപ്പെടുകയായിരുന്നു.
ഇതില് 40,000 രൂപ നേരത്തെ കൈപ്പറ്റി. ബാക്കി തുക നല്കിയില്ലെങ്കില് 12 ലക്ഷത്തിന്റെ ബില്ല് പിടിച്ചുവെക്കുമെന്ന് ഭീഷണിപ്പെടുത്തുകയും ചെയ്തിരുന്നു.
ശ്രദ്ധിക്കുക: പൊതുജനങ്ങള്ക്ക് അഴിമതി സംബന്ധമായ വിവരങ്ങള് ലഭിച്ചാല് വിജിലന്സിന്റെ ടോള് ഫ്രീ നമ്പറുകളായ 1064, 8592900900 എന്നിവയിൽ വിളിച്ചോ, അല്ലെങ്കില് 94477789100 എന്ന വാട്സ്ആപ് നമ്പറിലോ അറിയിക്കാം.