കേരളം
കൊവിഡ് പ്രതിസന്ധി: നഗരങ്ങളില്‍ തൊഴിലില്ലായ്മ വര്‍ധിക്കുന്നു
കൊവിഡ് രണ്ടാം തരംഗവും ഇന്ത്യന്‍ സമ്പദ്വ്യവസ്ഥക്ക് കടുത്ത ഭീഷണിയാകുന്നു . നഗരങ്ങളിലെ തൊഴിലില്ലായ്മ നിരക്ക് കുത്തനെ ഉയര്‍ന്നതായാണ് വിലയിരുത്തല്‍. കൊവിഡ് കണക്കുകള്‍ കുതിച്ചുയര്‍ന്നതിനെ തുടര്‍ന്ന് മിക്കയിടങ്ങിലും ലോക്ഡൗണ്‍ ഏര്‍പ്പെടുത്തിയതും ബിസിനസ് സ്ഥാപനങള്‍ അടച്ചിട്ടതും കൊവിഡ് ഭീതിയില്‍ പലായനം രൂക്ഷമായതുമാണ് തൊഴിലില്ലായ്മക്ക് ആക്കം കൂട്ടിയത്.
നഗരങ്ങളിലെ തൊഴിലില്ലായ്മ നിരക്ക് 10 ശതമാനമായതായി സെന്‍റര്‍ ഫോര്‍ മോണിറ്ററിങ് ഇന്ത്യന്‍ ഇക്കോണമി (സി.എം.ഐ.ഇ) അറിയിച്ചു. കോവിഡിന്റെ ആദ്യഘട്ടത്തില്‍ 2020 മാര്‍ച്ചില്‍ പ്രധാനമന്ത്രി രാജ്യവ്യാപക ലോക്ഡൗണ്‍ ഏര്‍പ്പെടുത്തിയിരുന്ന സമയത്താണ് തൊഴിലില്ലായ്മ നിരക്ക് ഇത്രയും താഴ്ന്നിരുന്നത്.
2021 ഏപ്രില്‍ 18 ന് നഗരങ്ങളിലെ തൊഴിലില്ലായ്മ നിരക്ക് 10.72 ശതമാനമായി. ഏപ്രില്‍ 11ന് ഇത് 9.81 ശതമാനവും ഏപ്രില്‍ നാലിന് ഇത് 7.21 ശതമാനവുമായിരുന്നു. രണ്ടാഴ്ചക്കിടെ തൊഴിലില്ലായ്മ നിരക്കില്‍ 3.5 ശതമാനം വര്‍ധനയാണുണ്ടത്. രാജ്യത്ത് ഏറ്റവും കൂടുതല്‍ പ്രതിദിന കേസുകള്‍ റിപ്പോര്‍ട്ട് ചെയ്യുന്നത് മഹാരാഷ്ട്രയിലാണ് .
മറ്റു സംസ്ഥാനങ്ങളിലും കൊവിഡ് വ്യാപനം രൂക്ഷമായതോടെ തൊഴിലില്ലായ്മ നിരക്ക് ഇനിയും ഉയരുമെന്നാണ് വിലയിരുത്തല്‍. കൊവിഡ് പശ്ചാത്തലത്തില്‍ ഫാക്ടറികള്‍, ചെറു മാര്‍ക്കറ്റുകള്‍, തൊഴിലിടങ്ങള്‍, റീട്ടെയ്ല്‍ സര്‍വിസുകള്‍, റസ്റ്റോറന്റുകൾ മാളുകള്‍, സലൂണുകള്‍ തുടങ്ങിയവ അടച്ചിട്ടിരിക്കുകയാണ്. ഇത് തൊഴിലില്ലായ്മ നിരക്ക് ഉയരുന്നതിന് കാരണമായി.
