സാഗരകന്യകയ്ക്ക് ലോക റെക്കോർഡ്, ഏറ്റവും വലിയ മത്സ്യകന്യക ശിൽപ്പം

ശംഖുമുഖത്തെ സാഗര കന്യകയ്ക്ക് ഗിന്നസ് റെക്കോർഡ്. കാനായി കുഞ്ഞിരാമൻ രൂപകൽപ്പന ചെയ്ത ശിൽപ്പത്തിന് ലോകത്തെ ഏറ്റവും വലിയ മത്സ്യകന്യക ശിൽപമെന്ന റെക്കോർഡാണ് ലഭിച്ചിരിക്കുന്നത്. ചിപ്പിക്കുള്ളിൽ കിടക്കുന്ന തരത്തിലാണ് സാഗര കന്യകയുടെ ശിൽപ്പം നിർമ്മിച്ചിരിക്കുന്നത്. അപേക്ഷിക്കാതെയാണ് ഈ അംഗീകാരം എന്നത് ഇരട്ടി മധുരമാവുകയാണ്. 87 അടി നീളവും 25 അടി ഉയരവുമാണ് സാഗരകന്യക ശിൽപ്പത്തിനുള്ളത്.

1990 ൽ ആരംഭിച്ച് രണ്ട് വർഷമെടുത്താണ് ശിൽപ്പം നിർമ്മിച്ചത്. ടൂറിസം വകുപ്പാണ് കാനായി കുഞ്ഞിരാമനെ ശിൽപ്പ നിർമ്മാണം ഏൽപ്പിച്ചത്. ഈ നിർമ്മാണത്തിന്റെ പ്രതിഫലം അദ്ദേഹം വാങ്ങിയിട്ടില്ല.

ശിൽപ്പ നിർമ്മാണത്തിൽ പ്രതിസന്ധികളുണ്ടായിരുന്നുവെന്ന് പലപ്പോഴായി കാനായി കുഞ്ഞിരാമൻ പ്രതികരിച്ചിരുന്നു. അന്നത്തെ ജില്ലാ കളക്ടർ ആയിരുന്ന നളിനി നെറ്റോ നിർമ്മാണത്തെ എതിർത്തെങ്കിലും അന്നത്തെ മുഖ്യമന്ത്രിയായിരുന്ന കരുണാകരൻ ഇടപെട്ടാണ് ശിൽപ്പ നിർമ്മാണം പൂർത്തിയാക്കാൻ അനുമതി ലഭിച്ചതെന്ന് കാനായി പ്രതികരിച്ചിരുന്നു.