ആലുവയിൽ ഗുഡ്‌സ് ട്രെയിൻ പാളം തെറ്റി; നാലു ട്രെയിനുകൾ റദ്ദാക്കി

ആലുവയിൽ ഗുഡ്‌സ് ട്രെയിൻ പാളം തെറ്റി. ആന്ധ്രയിൽ നിന്നും കൊല്ലത്തേക്ക് സിമന്റുമായി പോകുകയായിരുന്ന തീവണ്ടിയാണ് പാളം തെറ്റിയത്. ട്രാക്ക് മാറുന്നതിനിടെയായിരുന്നു അപകടം. അവസാനത്തെ ബോഗികളാണ് പാളത്തിൽ നിന്നും തെന്നിമാറിയത്. രാത്രി 11 മണിയോടെയായിരുന്നു സംഭവം.

ഇതേത്തുടർന്ന് ആലുവ വഴിയുള്ള ട്രെയിൻ ഗതാഗതം സ്തംഭിച്ചു. പരിശ്രമത്തിനൊടുവിൽ രാത്രി രണ്ടുമണിയോടെ ഒരു വരിയിൽ ഗതാഗതം പുനഃസ്ഥാപിച്ചു. ട്രെയിൻ പാളം തെറ്റിയതിനെ തുടർന്ന് ആലുവ വഴി കടന്നുപോകുന്ന നാലു ട്രെയിനുകൾ റദ്ദാക്കി.

കണ്ണൂർ ഇന്റർസിറ്റി, ഗുരുവായൂർ- തിരുവനന്തപുരം ഇന്റർസിറ്റി, പുനലൂർ-ഗുരുവായൂർ, നിലമ്പൂർ- കോട്ടയം ട്രെയിനുകളാണ് റദ്ദാക്കിയത്. രാവിലെ 5.15 ന് പുറപ്പെടേണ്ട എറണാകുളം- പൂനെ എക്‌സ്പ്രസ് മൂന്നു മണിക്കൂർ വൈകി 8.15 ന് മാത്രമേ പുറപ്പെടുകയുള്ളൂ എന്ന് അധികൃതർ അറിയിച്ചു.