കേരളം
അറ്റ്ലസ് ജ്വല്ലറിയുടെ 57.45 കോടി രൂപയുടെ സ്വത്തുക്കള്‍ ഇഡി കണ്ടുകെട്ടി
സാമ്പത്തികത്തട്ടിപ്പ് കേസില്‍ അറ്റ്ലസ് ജ്വല്ലറിയുടെ 57.45 കോടി രൂപയുടെ സ്വത്തുക്കള്‍ എന്‍ഫോഴ്സ്മെന്റ് ഡയറക്ടറേറ്റ് കണ്ടുകെട്ടി. അറ്റ്ലസ് ജ്വല്ലറി പ്രൈവറ്റ് ലിമിറ്റഡ്, ഉടമയായ അറ്റ്ലസ് രാമചന്ദ്രന്‍ (എം എം രാമചന്ദ്രന്‍), ഇന്ദിര രാമചന്ദ്രന്‍ എന്നിവരുടെ പേരിലുള്ള സ്വത്തുക്കളാണ് ഇഡി കണ്ടുകെട്ടിയത്.
ജനകോടികളുടെ വിശ്വസ്ത സ്ഥാപനമെന്ന പരസ്യത്തോടുകൂടി പ്രവർത്തിക്കുന്ന സ്ഥാപനത്തിന് അത്ര വിശ്വസ്തത പോരാ എന്ന് തെളിയിക്കുന്നതാണ് സംഭവം.വായ്പാ തിരിച്ചടവ് മുടങ്ങിയതിന് മൂന്നു വർഷത്തിലേറെ കാലത്തെ ദുബായ് ജയിലിലെ തടവ് അനുഭവിച്ചു അദ്ദേഹം ജയിൽ മോചിതനായത് ഒരു വർഷം മുൻപാണ്.
242 കോടി രൂപയുടെ ബാങ്ക് സാമ്പത്തിക തട്ടിപ്പ് കേസിലാണ് കേരളത്തിൽ അറ്റ്ലസിനെതിരായ ഇപ്പോഴത്തെ നടപടി. സ്വര്‍ണം, വെള്ളി, രത്‌നാഭരണങ്ങള്‍, ബാങ്ക് നിക്ഷേപങ്ങള്‍ തുടങ്ങിയവ ഉള്‍പ്പെടെയാണ് കണ്ടുകെട്ടിയത്. സൗത്ത് ഇന്ത്യന്‍ ബാങ്ക് തൃശൂര്‍ ശാഖയില്‍നിന്ന് 2013-18 സമയത്ത് 242 കോടി രൂപ അറ്റലസ് ജ്വല്ലറി വായ്പ എടുത്തിരുന്നു. വ്യാജരേഖകള്‍ ഉപയോഗിച്ചാണ് വായ്പ എടുത്തതെന്ന് അന്വേഷണ സംഘം കണ്ടെത്തിയതിനെ തുടർന്ന് കേരള പൊലീസ് കേസ് രജിസ്റ്റർ ചെയ്തു. ഈ കേസിൽ ഇഡിയും അന്വേഷണം നടത്തി. ജനുവരിയിൽ അറ്റ്ലസ് ജ്വല്ലറിയുടെ മുംബൈ, ബെംഗളൂരു, ദില്ലി ശാഖകളിലും ഓഫിസുകളിലും ഇ ഡി റെയ്ഡ് നടത്തി 26.50 കോടിയുടെ സ്വത്തുക്കള്‍ പിടിച്ചെടുത്തു.
