ദേശീയം
ഇനി ആധാർ എപ്പോഴും കയ്യിൽ കരുതേണ്ട; മുഖം കാട്ടി ഇ-ആധാർ ഡൗൺലോഡ് ചെയ്യാം
നമ്മുടെ ദൈനംദിന ജീവിതത്തിൽ പല കാര്യങ്ങൾക്കും ആധാർ കാർഡ് ആവശ്യമാണ്. കൊവിഡ് വാക്സിൻ എടുക്കാൻ പോലും ആധാർ നമ്പർ വേണം. വിവിധ ഓണ്‍ലൈന്‍ സേവനങ്ങൾക്കും ആധാർ കൂടിയേ തീരു. എന്നാൽ എപ്പോഴും ആധാര്‍ കാര്‍ഡ് കൈയില്‍ കരുതേണ്ടതില്ല. വിവിധ സേവനങ്ങള്‍ ഇ- ആധാര്‍ മതിയാകും.
ഇ- ആധാര്‍ കിട്ടാന്‍ രണ്ടുവഴികളുണ്ട്. എന്റോള്‍മെന്റ് നമ്പറോ ആധാര്‍ നമ്പറോ ഉണ്ടെങ്കില്‍ ഇ- ആധാര്‍ ഡൗണ്‍ലോഡ് ചെയ്യാന്‍ സാധിക്കും. ഇപ്പോള്‍ ഇ- ആധാറിനായി ആധാര്‍ കാര്‍ഡുടമകള്‍ക്ക് വേണ്ടി പുതിയ ഫീച്ചര്‍ അവതരിപ്പിച്ചിരിക്കുകയാണ് യുഐഡിഎ. ഫെയ്‌സ് ഓതന്റിക്കേഷന്‍ സംവിധാനം ഉപയോഗിച്ച് മാത്രം ഓണ്‍ലൈനിലൂടെ ആധാര്‍ കാര്‍ഡ് ഡൗണ്‍ലോഡ് ചെയ്യാനുള്ള സൗകര്യമാണ് ഒരുക്കിയത്.
യുഐഡിഎയുടെ വെബ്‌സൈറ്റില്‍ പ്രവേശിച്ചാണ് നടപടികള്‍ സ്വീകരിക്കേണ്ടത്. യഥാര്‍ത്ഥ ആധാറിന്റെ പകര്‍പ്പാണ് ഡൗണ്‍ലോഡ് ചെയ്യുന്നത്. ഇ- ആധാര്‍ കാര്‍ഡ് രാജ്യത്ത് എവിടെ ഉപയോഗിക്കാനും അനുമതിയുണ്ട്. യുഐഡിഎയുടെ വെബ് സൈറ്റില്‍ കയറിയ ശേഷം ഗെറ്റ് ആധാര്‍ കാര്‍ഡില്‍ ക്ലിക്ക് ചെയ്യുക. തുടര്‍ന്ന് റീഡയറക്ട് ചെയ്യപ്പെടുന്ന പേജില്‍ ഫെയ്‌സ് ഓതന്റിക്കേഷന്‍ ഓപ്ഷന്‍ ക്ലിക്ക് ചെയ്താണ് മുന്നോട്ടുപോകേണ്ടത്.
ഫെയ്‌സ് ഓതന്റിക്കേഷന്‍ ഓപ്ഷന്‍ തെരഞ്ഞെടുക്കുന്നതിന് മുന്‍പ് മൊബൈല്‍ നമ്പര്‍ നല്‍കണം. തുടര്‍ന്നാണ് ഓതന്റിക്കേഷന്‍ പ്രക്രിയ. യുഐഡിഎ സ്വമേധയാ കാര്‍ഡുടമയുടെ ചിത്രം എടുക്കുന്ന വിധമാണ് ക്രമീകരണം. ഇതിന് പിന്നാലെ വിജയകരമായി ഇ-കാര്‍ഡ് ഡൗണ്‍ലോഡ് ചെയ്യാവുന്നതാണ്.
