കേരളം
കൊവിഡ് നിയന്ത്രണ പ്രവർത്തനങ്ങളിൽ സാക്ഷരതാ മിഷനും
കൊവിഡ് മഹാമാരി നിയന്ത്രണത്തിന് സംസ്ഥാന സർക്കാരിന് സഹായമേകുന്ന നടപടികളുമായി കേരള സംസ്ഥാന സാക്ഷരതാമിഷൻ അതോറിറ്റി. ക്വാറന്റയിൻ സെന്ററുകൾ സജ്ജീകരിക്കൽ, പഠിതാക്കൾക്ക് വാക്സിനേഷൻ ഉറപ്പാക്കൽ, പ്രതിരോധ പ്രവർത്തനങ്ങളിലെ പങ്കാളിത്തം എന്നിവ ഉറപ്പാക്കാൻ പ്രേരക്മാർക്ക് കേരള സംസ്ഥാന സാക്ഷരതാമിഷൻ അതോറിറ്റി ഡയറക്ടർ ഡോക്ടർ പി എസ് ശ്രീകല നിർദേശം നൽകി.
ടോയ്ലറ്റ് സൗകര്യമുള്ള വിദ്യാകേന്ദ്രങ്ങൾ ക്വാറന്റയിൻ ആവശ്യത്തിനായി വിട്ടുനൽകുക, അവയുടെ ചുമതല പ്രേരക്മാർ നിർവഹിക്കുക, വാക്സിനേഷൻ രജിസ്ട്രേഷന് തടസമുള്ള പഠിതാക്കൾക്ക് പ്രേരക്മാർ സഹായം നൽകുക, ആദിവാസി / പിന്നാക്ക പ്രദേശങ്ങളിലുള്ള പഠിതാക്കൾക്കും മറ്റുള്ളവർക്കും ഉൾപ്പെടെ വാക്സിനേഷൻ രജിസ്ട്രേഷനുള്ള സഹായം പ്രേരക്മാർ നൽകുക, തദ്ദേശസ്വയംഭരണ സ്ഥാപനങ്ങളുടെ പ്രതിരോധ പ്രവർത്തനങ്ങളിൽ പങ്കാളികളാകുക തുടങ്ങിയ നിർദേശങ്ങളാണ് പ്രേരക്മാർക്ക് നൽകിയത്.
ഇക്കാര്യത്തിൽ പ്രേരക്മാർ അതത് തദ്ദേശസ്വയംഭരണ സ്ഥാപനങ്ങളുമായി ബന്ധപ്പെട്ട് പ്രവർത്തിക്കണമെന്നും ജില്ലാ കോ–ഓഡിനേറ്റർമാർ അവയുടെ മേൽനോട്ടം വഹിക്കണമെന്നും ഡയറക്ടർ നിർദേശിച്ചു.