ശബരിമല സ്‌പെഷ്യല്‍ വന്ദേഭാരത് സര്‍വീസ് ആരംഭിച്ചു; ഇന്ന് വൈകീട്ട് 4.15ന് കോട്ടയത്തെത്തും

ശബരിമല തീര്‍ത്ഥാടകരുടെ തിരക്ക് പരിഗണിച്ച് ചെന്നൈ- കോട്ടയം റൂട്ടില്‍ പ്രഖ്യാപിച്ച സ്‌പെഷ്യല്‍ വന്ദേഭാരത് ട്രെയിന്‍ ചെന്നൈയില്‍ നിന്ന് ഇന്ന് രാവിലെ പുറപ്പെട്ടു. ചെന്നൈ സെന്‍ട്രലില്‍ നിന്ന് പുലര്‍ച്ചെ 4.30ന് പുറപ്പെട്ട ട്രെയിന്‍ വൈകുന്നേരം 4.15ന് കോട്ടയം സ്റ്റേഷനിലെത്തും. തിരിച്ച് ഈ ട്രെയിന്‍ ശനിയാഴ്ച പുലര്‍ച്ചെ 4.40ന് കോട്ടയം സ്റ്റേഷനില്‍ നിന്ന് പുറപ്പെടും. ശനിയാഴ്ച വൈകുന്നേരം 5.15ന് ട്രെയിന്‍ ചെന്നൈ സെന്‍ട്രലില്‍ എത്തും.

ശബരിമലയിലെ തിരക്ക് പരിഗണിച്ച് ഡോ. എംജിആര്‍ ചെന്നൈ സെന്‍ട്രലില്‍ നിന്ന് കോട്ടയം വരെ ഈ മാസം 15 മുതല്‍ 24 വരെ സര്‍വീസ് നടത്താനാണ് ദക്ഷിണ റെയില്‍വേ തീരുമാനിച്ചത്.ചെന്നൈയില്‍ നിന്ന് വെള്ളി, ഞായര്‍ ദിവസങ്ങളിലും തിരിച്ച് കോട്ടയത്തു നിന്ന് ശനി, തിങ്കള്‍ ദിവസങ്ങളിലും ട്രെയിന്‍ സര്‍വീസ് ഉണ്ടായിരിക്കും. നാല് സര്‍വീസുകളാണ് നടത്തുക.