കേരളം
തദ്ദേശ തെരഞ്ഞടുപ്പ്: കേരളത്തിലേക്ക് വരുന്നവര്ക്കുള്ള നിയന്ത്രണം നീക്കണം; വിവിധ സംഘടനകള് മുഖ്യമന്ത്രിക്ക് നിവേദനം നല്കി
തദ്ദേശ തെരഞ്ഞടുപ്പ് അടുക്കുന്നതോടെ കേരളത്തിലേക്ക് വരുന്നവര്ക്കുള്ള നിര്ബന്ധ ക്വാറന്റൈന് അടക്കമുള്ള നിയന്ത്രണങ്ങള് നീക്കണമെന്ന ആവശ്യം ശക്തമാകുന്നു.
ബംഗളൂരുവിലെയും ചെന്നൈയിലെയും വിവിധ മലയാളി സംഘടനകള് ഈ ആവശ്യമുന്നയിച്ച് മുഖ്യമന്ത്രിക്ക് നിവേദനം നല്കി. നിയന്ത്രണങ്ങള് നീക്കുന്നതിനെക്കുറിച്ച് സര്ക്കാര് ആലോചിക്കുകയാണെന്ന് അധികൃതര് അറിയിച്ചു.
ചെന്നൈയിലും ബംഗളൂരുവിലുമായി ഏകദേശം 20 ലക്ഷം മലയാളികളുണ്ടെന്നാണ് കണക്ക്. ഭൂരിഭാഗം പേരും വോട്ടെടുപ്പ് ദിവസം നാട്ടിലേക്ക് പോകാന് തയ്യാറെടുക്കുകയാണ്.
എന്നാല്, കേരളത്തില് നിയന്ത്രണങ്ങള് തുടരവേ പലര്ക്കും ഇപ്പോഴും അവ്യക്തത തുടരുകയാണ്. രാജ്യത്ത് കേരളത്തില് മാത്രമാണ് മറ്റ് സംസ്ഥാനങ്ങളില് നിന്ന് വരുന്നവര്ക്ക് ഏഴ് ദിവസം നിര്ബന്ധിത ക്വാറിന്റൈനും മറ്റ് നിയന്ത്രണങ്ങളുമുള്ളത്.
ഒരാഴ്ചയ്ക്കകം വന്ന് മടങ്ങുന്നവര്ക്ക് അടിയന്തര ആവശ്യത്തിനായി രജിസ്റ്റര് ചെയ്തു വരാമെങ്കിലും പലര്ക്കും സംശയങ്ങള് ബാക്കിയാണ്. സര്ക്കാര് വൈകാതെ നിയന്ത്രണങ്ങളില് ഇളവ് പ്രഖ്യാപിക്കുമെന്ന പ്രതീക്ഷയിലാണ് പലരും.
വോട്ട് ചെയ്യാനെത്തുന്നവര്ക്കായി കൊവിഡ് ജാഗ്രത പോര്ട്ടലില് പ്രത്യേക ഓപ്ഷന് ഉള്പ്പെടുത്തണമെന്ന ആവശ്യവും ഉയരുന്നുണ്ട്.