ആരോഗ്യം
പ്രാതല്‍ വൈകിയാല്‍ പ്രമേഹ സാധ്യത
ആഹാരം കഴിച്ചാല്‍ പോരാ, ഇത് കഴിയ്ക്കുന്ന രീതിയും സമയവുമെല്ലാം പ്രധാനമാണ്. സമയം തെറ്റി കഴിച്ചാല്‍ പല രോഗങ്ങളും കൂടെപ്പോരുമന്നതാണ് വാസ്തവം. ഇത് പ്രാതലിന്റെ കാര്യത്തില്‍ പച്ചപ്പരമാര്‍ത്ഥമാണെന്നാണ് പഠനങ്ങള്‍ വ്യക്തമാക്കുന്നത്. ഒരു ദിവസത്തെ പ്രധാന ഭക്ഷണം പ്രാതലാണെന്നതാണ് വാസ്തവം. എന്നാല്‍ പലരും അസൗകര്യങ്ങള്‍ കാരണം ഒഴിവാക്കുന്ന ഭക്ഷണം ഏതെന്ന് ചോദിച്ചാല്‍ ഇത് പ്രാതലാണെന്ന് പറയാം. എന്നാല്‍ പ്രാതല്‍ ഈ വിധത്തില്‍ ഒഴിവാക്കുന്നതും വൈകിപ്പിയ്ക്കുന്നതുമെല്ലാം ആരോഗ്യത്തിന് ദോഷം വരുത്തുമെന്നതാണ് വാസ്തവം.
പലരും പ്രാതല്‍ സമയമില്ലെന്ന് പറഞ്ഞും മറ്റും ഒഴിവാക്കും. മറ്റ് ചിലരാകട്ടെ, രാവിലെ തിരക്കുകള്‍ കഴിഞ്ഞ് സൗകര്യം പോലെ കഴിയ്ക്കും. ഇത് 9, 10 എന്നതെല്ലാമായിത്തീരും. എന്നാല്‍ ഇത് വരുത്തുന്ന പ്രശ്‌നങ്ങള്‍ പലതാണ്. കഴിച്ചാല്‍ മാത്രം പോരാ, പ്രാതല്‍കഴിയ്ക്കുന്ന സമയവും ഏറെ പ്രധാനമാണ്.
പ്രാതല്‍ രാവിലെ എട്ടിന് മുന്‍പ് കഴിയ്ക്കുന്നതാണ് നല്ലതെന്നും ഇത് ടൈപ്പ് 2 പ്രമേഹ സാധ്യത കുറയ്ക്കുമെന്നം ഫ്രാന്‍സിലെ ഗവേഷകര്‍ നടത്തിയ പഠനത്തില്‍ കണ്ടെത്തി. രാവിലെ 9ന് ശേഷം പ്രാതല്‍ കഴിയ്ക്കുന്നവര്‍ക്ക് എട്ടിന് മുന്‍പേ കഴിയ്ക്കുന്നവരേക്കാള്‍ ടൈപ്പ് 2 പ്രമേഹം വരാനുള്ള സാധ്യത 59 ശതമാനം കൂടുതലാണെന്ന് പഠനങ്ങള്‍ പറയുന്നു.
ഇതു പോലെ തന്നെ പ്രാതല്‍ ഒഴിവാക്കുന്നതും പ്രമേഹ സാധ്യത വര്‍ദ്ധിപ്പിയ്ക്കുന്ന ഒന്നാണ്. ഇത് പ്രമേഹം മാത്രമല്ല, കൊളസ്‌ട്രോള്‍ വര്‍ദ്ധനവിനും കാരണമാകുമെന്ന് ഗവേഷകര്‍ കണ്ടെത്തിയിട്ടുണ്ട്. പ്രാതല്‍ പൂര്‍ണമായും ഉപേക്ഷിയ്ക്കുന്നത് തടി കൂടാനും പല തരം രോഗങ്ങള്‍ക്കും വഴിയൊരുക്കുന്ന ഒന്നാണ്.
ഇതു പോലെ തന്നെ രാത്രി ഭക്ഷണം 7ന് മുന്‍പേ കഴിയ്ക്കുന്നതാണ് ആരോഗ്യകരമെന്ന് തെളിഞ്ഞിട്ടുണ്ട്. അത്താഴം വൈകിക്കഴിയ്ക്കുന്നത്, പ്രത്യേകിച്ചും 10ന് ശേഷം കഴിയ്ക്കുന്നതും പ്രമേഹ സാധ്യത വര്‍ദ്ധിപ്പിയ്ക്കുന്ന ഘടകമാണ്. നേരത്തെയുള്ള അത്താഴവും അതു പോലെ പ്രാതലുമാണ് ആരോഗ്യത്തിനും അസുഖങ്ങള്‍ വരാതെ തടയുന്നതിനും ആരോഗ്യകരം.
