ഡ്യൂട്ടിമാറി ബസ് ഓടിച്ചു; ആൾമാറാട്ടം നടത്തിയ ഡ്രൈവറെ കയ്യോടെ പൊക്കി വിജിലൻസ്

ഡ്യൂട്ടി ചെയ്യേണ്ടയാൾക്ക് പകരം ഡ്യൂട്ടിമാറി ബസ് ഓടിച്ച കെ.എസ്.ആർ.ടി.സി ഡ്രൈവറെ പിടികൂടി. തിരുവനന്തപുരം ഡിപ്പോയിൽ നിന്നുള്ള തിരുവനന്തപുരം – മംഗലാപുരം സ്‌കാനിയ ബസിൽ ആൾമാറാട്ടം നടത്തിയ ഡ്രൈവറെയാണ് കെ.എസ് .ആർ.ടി.സിയുടെ ആഭ്യന്തര വിജിലൻസ് വിഭാഗം ആലപ്പുഴയിൽ വച്ച് പിടികൂടിയത്.

ഡ്യൂട്ടിക്ക് നിയോഗിച്ച വിജീഷ് എന്ന ഡ്രൈവർക്ക് പകരമാണ് ഡ്യൂട്ടി കഴിഞ്ഞ സന്ദീപ് എന്ന ഡ്രൈവർ ബസോടിച്ചതെന്നാണ് വിജിലൻസിന്റെ കണ്ടെത്തൽ.

ഡ്യൂട്ടിക്ക് നിയോഗിച്ചയാൾ സ്വകാര്യ ബസ് ഓടിക്കാൻ പോയശേഷം പകരം മറ്റൊരു ഡ്രൈവറെ നിയോഗിക്കുകയായിരുന്നെന്നാണ് ആരോപണം. ഇതേക്കുറിച്ച് കെ.എസ് .ആർ.ടി.സി വിജിലൻസ് എക്സിക്യൂട്ടീവ് അന്വേഷണം നടത്തും. വീഴ്ച വരുത്തിയ ജീവനക്കാരെ സസ്‌പെന്റ് ചെയ്യാൻ നിർദേശം നൽകിയതായി അറിയുന്നു.