കേരളം
സംസ്ഥാനത്തെ അവയവ തട്ടിപ്പ് വ്യാജരേഖകള് മറയാക്കി; ക്രൈംബ്രാഞ്ച്
സംസ്ഥാനത്തെ അവയവ തട്ടിപ്പ് നടന്നത് വ്യാജരേഖകള് മറയാക്കിയെന്ന് ക്രൈംബ്രാഞ്ച് കണ്ടെത്തല്. പണം വാങ്ങി അവയവങ്ങള് നല്കിയവര് സാമൂഹിക പ്രതിബദ്ധതയുടെ ഭാഗമായി അവയവങ്ങള് നല്കുന്നുവെന്ന സര്ട്ടിഫിക്കറ്റ് ഉദ്യോഗസ്ഥരുടെ ഒത്താശയോടെ നേടുന്നുവെന്നാണ് കണ്ടെത്തല്. പ്രതികള്ക്കെതിരെ അവയവ വ്യാപാരം, വഞ്ചന, ക്രിമിനല് ഗൂഢാലോചന എന്നീ കുറ്റങ്ങള് ചുമത്തി.
കുറ്റകൃത്യം തടയേണ്ട സര്ക്കാര് ഉദ്യോഗസ്ഥന് തന്നെ വിവരം മറച്ചുവച്ചു എന്ന കുറ്റവും ചുമത്തിയിട്ടുണ്ട്. ഗൂഢാലോചനയില് നിരവധി പേരുണ്ടെന്നും എഫ്ഐആറില് പറയുന്നു. എന്നാല് ആരെയും പ്രതി ചേര്ത്തിട്ടില്ല. അവയവ മാറ്റങ്ങളില് പ്രധാനമായും നടന്നത് വൃക്കകളുടേതാണെന്നും കണ്ടെത്തലുണ്ട്.
സംസ്ഥാനത്ത് കഴിഞ്ഞ രണ്ടുവര്ഷം നടന്ന അവയവ ദാനങ്ങളുടെ വിഷദാംശങ്ങള് തേടി ആരോഗ്യവകുപ്പിന് ക്രൈംബ്രാഞ്ച് കത്തു നല്കി. അതേസമയം, സംസ്ഥാനത്തെ അവയവകച്ചവട മാഫിയയ്ക്കെതിരെ ക്രൈംബ്രാഞ്ച് അന്വേഷണം ഊര്ജിതമാക്കി.
അവയവ ദാതാക്കളുടെയും സ്വീകര്ത്താക്കളുടെയും വിവരങ്ങളും ശേഖരിക്കുന്നുണ്ട്. കഴിഞ്ഞ രണ്ടുവര്ഷങ്ങളില് നടന്ന 35 അവയവദാനങ്ങള് ക്രൈംബ്രാഞ്ച് പരിശോധിച്ചു.
ദാതാക്കളുടെ പശ്ചാത്തലമാണ് ക്രൈംബ്രാഞ്ചിനെ ഞെട്ടിച്ചത്. ഗുണ്ടകള് മുതല് കഞ്ചാവുകേസിലെ പ്രതികള് വരെ ഇതില്പെടുന്നു. ഇതോടെയാണ് ദാതാക്കളുടെ സാമൂഹിക പ്രതിബദ്ധത സര്ട്ടിഫിക്കറ്റില് ക്രൈംബ്രാഞ്ച് സംശയമുന്നയിക്കുന്നത്.
കേസില് ഇടനിലക്കാരുടെയും ആശുപത്രികളുടെയും അനധികൃത ഇടപെടലുകളുണ്ടോയെന്ന് കണ്ടെത്താനാണ് പരിശോധന. സംശയം തോന്നുന്ന സംഭവങ്ങളില് വിശദമായ അന്വേഷണം നടത്തും.
ആവശ്യമെങ്കില് കൂടുതല് വര്ഷങ്ങളിലെ കണക്കുകളും ശേഖരിക്കും. ആരോഗ്യവകുപ്പ് നല്കുന്ന രേഖകള് പരിശോധിച്ച് ഇതിന് പിന്നിലെ സര്ക്കാര് ഉദ്യോഗസ്ഥരെയും ഏജന്റുമാരിലേക്കും അന്വേഷണം കൊണ്ടുപോകാനാണ് ക്രൈംബ്രാഞ്ചിന്റെ നീക്കം.