നിയമസഭാ സമ്മേളനം ഇന്ന് ദുരന്തത്തിൽ മരിച്ചവർക്ക് ആദരാഞ്ജലി അർപ്പിച്ച് പിരിയും; വെള്ളി വരെ സഭ ചേരില്ല

ഇന്ന് നിയമസഭാ സമ്മേളനം ചേരും. പ്രകൃതി ദുരന്തത്തിൽ മരിച്ചവർക്ക് ആദരാഞ്ജലി അർപ്പിച്ച് സഭ പിരിയും. സ്പീക്കറും മുഖ്യമന്ത്രിയും പ്രതിപക്ഷ നേതാവും പ്രസംഗിക്കും. ദുരന്തത്തിന്റെ പശ്ചാത്തലത്തിൽ വെള്ളിയാഴ്ച വരെയുള്ള സഭാ നടപടികൾ മാറ്റി വയ്ക്കാൻ തീരുമാനിച്ചിട്ടുണ്ട്. തുടർന്നുളള നടപടിക്രമങ്ങൾ കാര്യോപദേശക സമിതി തീരുമാനിക്കും. സംസ്ഥാനത്തെ മഴക്കെടുതികൾ അവസാനിച്ചാൽ തിങ്കളാഴ്ച സഭാ സമ്മേളനം പുനരാരംഭിക്കും.

പതിനഞ്ചാം കേരള നിയമസഭയുടെ മൂന്നാമത് സമ്മേളനം ഒക്ടോബർ നാലിനാണ് ആരംഭിച്ചത്. നിയമ നിർമാണം പ്രധാന അജൻഡയായി പരിഗണിക്കുന്ന സമ്മേളനത്തിന്റെ ആദ്യ ദിവസം നാല് ബില്ലുകളാണ് പരിഗണിച്ചത്. രാജ്യത്തെ ആദ്യത്തെ കടലാസ്‌രഹിത നിയമസഭയെന്ന സ്വപ്‌ന നേട്ടം ഈ സമ്മേളനത്തിൽ കേരളപ്പിറവി ദിനമായ നവംബർ ഒന്നിന് കൈവരിക്കും.

24 ദിവസം നീളുന്ന സമ്മേളനം നവംബർ പന്ത്രണ്ടിനാണ് സമാപിക്കുന്നത്. ഇതിൽ 19 ദിവസം നിയമ നിർമാണത്തിനും നാല് ദിവസം അനൗദ്യോഗിക കാര്യങ്ങൾക്കും ഒരു ദിവസം ഉപധനാഭ്യർഥനകളുടെ പരിഗണനക്കുമാണ് നിശ്ചയിച്ചിരുന്നത്. ഓർഡിനൻസുകൾക്ക് പകരമുള്ള ബില്ലുകൾ യഥാസമയം സഭയിൽ അവതരിപ്പിച്ച് പാസ്സാക്കാൻ സാധിക്കാത്ത സാഹചര്യം മറികടക്കാനാണ് നിയമനിർമാണത്തിന് ഊന്നൽ നൽകി സഭാ സമ്മേളനം ചേരുന്നത്. നിലവിൽ 45 ഓർഡിനൻസുകളാണ് നിയമമാകാനുള്ളത്.