കേരളം
രോഗികളെ കണ്ടിട്ടുണ്ട്; കളമശ്ശേരി മെഡിക്കല് കോളേജ് അധികൃതരുടെ വാദം തള്ളി ഡോക്ടര് നജ്മ
കളമശ്ശേരി മെഡിക്കല് കോളേജില് ചികിത്സയിലിരിക്കെ രോഗികള് മരിച്ച സംഭവത്തില് മെഡിക്കല് കോളേജ് അധികൃതരുടെ വിശദീകരണം തള്ളി ഡോക്ടര് നജ്മ. ഹാരിസും ബൈഹക്കിയും ജമീലയും ചികിത്സയിലുണ്ടായിരുന്ന ദിവസങ്ങളില് താന് ഡ്യൂട്ടിയിലുണ്ടായിരുന്നുവെന്ന് അവര് പറഞ്ഞു. അനാസ്ഥകളുണ്ടാകുന്നതായി സൂപ്രണ്ടിനേയും ആര്എംഒയെയും അറിയിച്ചെങ്കിലും ഇക്കാര്യത്തില് അവര് പ്രതികരിക്കാന് തയ്യാറായില്ലെന്നും അവര് പറഞ്ഞു.
ഹാരിസിനേയും ബൈഹക്കിയേയും ജമീലയേയും കണ്ടിട്ടുണ്ടെന്നും പക്ഷേ അവരാരും മരിക്കുന്ന സമയത്ത് താന് ഡ്യൂട്ടിയില് ഉണ്ടായിരുന്നില്ലെന്നും ഡോക്ടര് നജ്മ പറഞ്ഞു. അങ്ങനെ എവിടേയും പറഞ്ഞിട്ടുമില്ല. ജമീലയുടേയും ബൈഹക്കിയുടേയും കാര്യത്തില് അനാസ്ഥയുണ്ടായതായി കണ്ണില്പ്പെട്ടിട്ടുണ്ട്. അത് സിസ്റ്റര്മാരോട് പറഞ്ഞിരുന്നുവെന്നും നജ്മ കൂട്ടിച്ചേര്ത്തു.
ജമീലയ്ക്ക് മാസ്ക് വെച്ചിരുന്നുവെങ്കിലും വെന്റിലേറ്റര് ഓഫായിരുന്നു. രോഗി വേഗത്തില് ശ്വസിക്കുന്ന ശബ്ദം കേട്ട് ചെന്നു നോക്കുമ്പോഴാണ് ഇത് ശ്രദ്ധയില്പ്പെട്ടത്. വെന്റിലേറ്റര് താന് തന്നെ ഓണ് ആക്കിയ ശേഷം സിസ്റ്ററോട് കാര്യങ്ങള് പറഞ്ഞ് മനസിലാക്കി. ബൈഹക്കിയുടേത് വെന്റിലേറ്റര് എടുത്തുകൊണ്ടുവരാനുള്ള താമസമായിരുന്നു.