Covid 19
കൊവിഡ് ലോക്ക് ഡൗണ്; ഗുജറാത്തിൽ മൂന്നോ നാലോ ദിവസത്തേക്ക് സമ്പൂര്ണ അടച്ചിടല് വേണമെന്ന് ഹൈക്കോടതി
രാജ്യത്ത് കൊവിഡ് രണ്ടാം വ്യാപനഘട്ടത്തിലാണ്. പ്രതിദിനം ഒരു ലക്ഷത്തോളം രോഗികള് റിപ്പോര്ട്ട് ചെയ്യുകയാണ്. ഗുജറാത്തില് കൊവിഡ് രൂക്ഷമായ സാഹചര്യത്തില് വൈറസ് വ്യാപനത്തെ തടയാന് കര്ഫ്യൂവോ ലോക്ക് ഡൗണോ വേണമെന്ന് ഹൈക്കോടതി.
സംസ്ഥാനത്ത് കൊവിഡ് വ്യാപനം കാരണം സ്ഥിതി വഷളാണെന്നു പറഞ്ഞ ചീഫ് ജസ്റ്റിസ് വിക്രം നാഥ് ആളുകള് കൂട്ടംകൂടുന്നത് വിലക്കിയേ പറ്റൂവെന്നും മൂന്നോ നാലോ ദിവസത്തേക്കു കര്ഫ്യൂവോ ലോക്ക് ഡൗണോ ഏര്പ്പെടുത്തുകയും എല്ലാത്തരത്തിലുള്ള ആള്ക്കൂട്ടങ്ങളും, രാഷ്ട്രീയ യോഗങ്ങള് ഉള്പ്പെടെ നിയന്ത്രിക്കുകയോ നിര്ത്തുകയോ ചെയ്യണമെന്നും ചീഫ് ജസ്റ്റിസ് പറഞ്ഞു.
അടിയന്തര നടപടി ഉണ്ടായേ തീരൂ. അല്ലാത്തപക്ഷം കൊവിഡ് നിയന്ത്രണാതീതമാവുമെന്ന് കോടതി അഭിപ്രായപ്പെട്ടു.അതേസമയം മുംബൈയില് ഇന്ന് പതിനായിരത്തിലധികം പേര്ക്ക് കോവിഡ് സ്ഥിരീകരിച്ചു. ഇന്നുമാത്രം പുതുതായി 10,030 പേര്ക്കാണ് വൈറസ് ബാധ സ്ഥിരീകരിച്ചത്. ഇതോടെ ആകെ രോഗികളുടെ എണ്ണം 4,72,332 ആയി.
ഇന്ന് 31 പേരാണ് കോവിഡ് മൂലം മുംബൈയില് മരിച്ചത്. 47,922 സാംപിളുകള് പരിശോധിച്ചപ്പോള് 7019 പേര്ക്ക് നെഗറ്റീവ് ആയി.ഡല്ഹിയില് ഇന്ന് 1,03,453 സാംപിളുകള് പരിശോധിച്ചപ്പോഴാണ് 5100 പേര്ക്ക് വൈറസ് ബാധ കണ്ടെത്തിയത്. 4.93 ശതമാനമാണ് ഇവിടുത്തെ ടെസ്റ്റ് പോസിറ്റിവിറ്റി നിരക്ക്. ഇന്ന് 2340 പേര് രോഗമുക്തരായി. 17,332 ആക്ടീവ് കേസുകളാണ് നിലവിലുള്ളത്. ഇവിടെ 17 പേരാണ് ഇന്ന് വൈറസ് ബാധയെത്തുടര്ന്ന് മരിച്ചത്.